Lajçak mbërrin në Prishtinë, nis takimin e mbyllur për media me presidenten Osmani
Presidentja e Kosovës, Vjosa Osmani ka pritur në takim emisarin e Bashkimit Europian për dialogun Kosovë – Serbi, Miroslav Lajcak.
Takimi do të mbahet i mbyllur për media.
Ndërsa më pas, Lajçaku pritet të takohet me kryeministrin e Kosovës Albin Kurti.
Deri më tani nuk është bërë e ditur nëse pas takimeve do të ketë deklarim për media.
Vizita e Lajçakut në Kosovë vjen një ditë pas takimit që ka zhvilluar në Beograd me presidentin serb Aleksandar Vuçiq.
Vuçiq tha se themelimi i Asociacionit dhe mbajtja e zgjedhjeve në komunat në veri, kanë qenë ndër temat kryesore të takimit.
“E theksova domosdoshmërinë për themelimin e Asociacionit të komunave me shumicë serbe, për mbajtjen e zgjedhjeve lokale në veri të Kosovës urgjentisht, dhe kërkova mbështetje nga Bashkimi Evropian për ndalimin e provokimeve të mëtejshme që vijnë nga Prishtina”- ka shkruar Vuçiq në profilin e tij në Instagram.
Pas katër viteve në krye të procesit dialogut Kosovë – Serbi, Lajçaku pritet të përfundojë mandatin e tij në gusht të vitit 2024. Ai kishte nisur mandatin, fillimisht njëvjeçar, në prill të vitit 2020.