Kurti pret ambasadoren e Kroacisë në Prishtinë, Danijela Barishiq

Kryetari i Lëvizjes Vetëvendosje, Albin Kurti ka pritur sot në një takim ambasadoren e Kroacisë në Kosovë, Danijela Barishiq.

Gjatë këtij takimi, Kurti ka thënë se çështja e punësimit, drejtësia dhe luftimi i krimit të organizuar dhe korrupsionit, janë prioritete të cilat i dhanë mandate LVV-së në zgjedhjet e 14 shkurtit.

Përmes një postimi në Facebook, LVV bënë të ditur gjatë këtij takimi u fol edhe për marrëdhëniet e mira mes dy vendeve dhe themllimin e tyre të mëtejmë.

Postimi i plotë i LVV-së për Takimin e Kurtit me ambasadoren Danijela Barishiq:

Sot, kryeministri në ardhje, Albin Kurti, bashkë me deputetin e legjislaturës së re, Xhelal Sveçla, deputetin e IRDK-së që njëherit ka qenë edhe anëtarë i grupit ndërparlamentar për miqësi me Kroacinë, Elbert Krasniqi, dhe asistenten ekzekutive, Valë Gjonbalaj, priti në takim ambasadoren e Kroacisë në Kosovë, znj. Danijela Barishiq, të shoqëruar nga sekretari i parë i kësaj ambasade, z. Mladen Delivuk.

Ambasadorja, znj. Barishiq e uroi kryetarin Kurti për fitoren në këto zgjedhje dhe i dëshiroi sukses të mëtejmë në punën e tij drejt formimit të institucioneve të reja në vend. Ajo ritheksoi përkrahjen e shtetit kroat për Kosovën dhe rrugëtimin e saj drejt anëtarësimit në institucione ndërkombëtare. Kryeministri në ardhje, Albin Kurti, e falënderoi për urimin dhe ndau vlerësimin e lartë për marrëdhëniet politike e diplomatike midis dy shteteve tona duke potencuar se ato vetëm sa do të thellohen edhe më tutje me qeverinë e re. Ai po ashtu e njoftoi ambasadoren znj. Barishiq me disa prej prioriteteve kyçe që i kanë dhënë Lëvizjes VETËVENDOSJE! mandat të fuqishëm në këto zgjedhje, e që janë punësimi, drejtësia dhe luftimi i krimit të organizuar dhe korrupsionit të lartë. Progresi në këto fusha është parakusht për një shtet stabil dhe funksional, theksoi Kurti. Në fund, të dy ndanë bindjen që marrëdhëniet e mira bilaterale mes dy shteteve tona do të rriten e zgjerohen edhe më tej në të ardhmen.