Kosnett: Mohimi i masakrave është gabim por fjala nuk duhet të kriminalizohet

Ambasadori i Shteteve të Bashkuara të Amerikës në Kosovë, Philip Kosnett ka komentuar mohimin që Presidenti i Serbisë i ka bërë Masakrës së Reçakut.

I ftuar në emisionin “Jeta në Kosovë”, Kosnett tha se nuk ka vend për mohimin e ngjarjeve në Reçak.

“Së pari, masakra e Reçakut është fakt historik. Nuk ka asnjë dyshim, ka pasur shumë vëzhgues të pavarur, gazetarë, Uilliam Ualker, të cilët kanë dëshmuar që ajo ka qenë një masakër e tmerrshme. Dhe është e vërtetë. Kushdo që e mohon këtë është gabim i madh. Është revizionizëm historik dhe është i padobishëm, do të mund të përdorja edhe mbiemra të tjerë për ta përshkruar këtë, por po e lë me kaq”, tha ai.

Megjithatë, sipas ambasadorit, politika amerikane është e kujdesshme për të mos e konsideruar krim fjalën e askujt.

“Por, si një amerikan, mua më duhet të them që ne jemi shumë të kujdesshëm rreth kriminalizimit të lirisë së shprehjes. Sipas legjislacionit në Amerikë, ne u kemi lënë shumë liri njerëzve që të flasin, madje edhe nëse ajo që thonë është e gabuar, fyese apo ofenduese. Gjithmonë po flas sipas legjislacionit në Shtetet e Bashkuara, ne mendojmë që duhet të jetë një prag shumë i lartë për ta bërë të folurit vepër penale”, theksoi ambasadori.

Të enjten, presidenti i Serbisë, Aleksandër Vuçiq ka reaguar pasi Gjykata në Prishtinë e ka dënuar me dy vjet burg ish-ministrin e Administrimit të Pushtetit Lokal, Ivan Todosijeviq.

Ai e ka quajtur trillim masakrën e Reçakut duke thënë se dënimi i tij është i frikshëm.

Pas kësaj deklarate të Vuqiq ka reaguar edhe Ambasada amerikane në Kosovë, e cila ka kërkuar kujdes në gjykimet në lidhje me deklaratat që jepen për masakrën e Reçakut.

Emisionin e plotë mund ta ndiqni në linkun e mëposhtëm: