Foto: Urim Krasniqi/KALLXO.com
Frrok Kristaj shpallet fitues i çmimit 'Anton Çetta’
Frrok Kristaj, studiues dhe promovues i trashëgimisë kulturore e shpirtërore, është shpallur fitues i çmimit “Anton Çetta”.
Këtë çmim Kristaj e mori për punën e bërë gjatë gjithë veprimtarisë së tij mbi gjysmë shekulli në fushën e trashëgimisë kulturore e shpirtërore.
Çmimi Kristajt iu dorëzua nga kryeministri në detyrë, Abdullah Hoti, gjatë një ceremonie që u mbajt sot në Bibliotekën Kombëtare, “Pjetër Bogdani” në Prishtinë.
Me këtë rast, kryeministri Hoti tha se çmimi që ndahet sot lidhet me emrin e një prej personaliteteve që gëzon respektin e të gjithëve.
“Me themelimin dhe ndarjen e këtij çmimi është pasuruar jeta kulturore në Prishtinës, si rrallë më parë, duke pasur parasysh edhe situatën aktuale”, ka thënë ndër të tjerash Hoti.
“Jam i nderuar, me këtë çmim duke pasur parasysh kontributin e Çettës”, ka thënë fituesi Kristaj.
Ndërsa, Ministrja e Ministrisë së Kulturës, Rinisë dhe Sportit, Vlora Dumoshi është shprehur se ky çmim lartëson edhe më shumë figurën e Anton Çettës.
“E vlerësoj mbështetjen e kryeministrit Hoti në themelimin e këtij çmimi vjetor për figurën e Çettës”, ka thënë Dumoshi.
Studiuesi Arsim Canolli në emër të jurisë ka arsyetuar çmimin e ndarë për Kristajn.
“Mbi gjysmë shekulli Kristaj ka kontribuar në dokumentimin, ruajtjen e dhe promovimin e trashëgimisë kulturore e shiprtërore”, ka thënë ndër të tjerash Canolli.
Çmimi “Anton Çetta” është themeluar në nëntor të 2020-tës nga MKRS.
Nëntori i kaluar ishte shpallur “Muajit i Anton Çettës” nga Qeveria e Kosovës për të kujtuar 100 vjetorin e lindjes dhe 25 vjetorin e vdekjes së Çettës si dhe 30 vjetorin e fillimit të aksionit për pajtimin e gjaqeve.