![](https://kallxo.com/wp-content/uploads/2024/06/UP-ja-shenon-Javene-krenarise-720x480.jpg)
Foto: Universiteti i Prishtinës/Facebook
Flamuri i komunitetit LGBTQI+ vendoset para Rektoratit, Universiteti i Prishtinës shënon "Javën e Krenarisë"
Universiteti i Prishtinës ka bërë të ditur se për të shënuar “Javën e Krenarisë” ka ngritur flamurin LGBTQI+ në mjediset e Rektoratit të Universitetit.
“Ky aktivitet përfaqëson përkushtimin e palëkundur institucional ndaj gjithëpërfshirjes, diversitetit dhe drejtësisë sociale, vlera këto që përfaqësojnë idealin e institucionit dhe të ardhmes që synohet të modelohet”- thuhet në njoftimin e UP-së në Facebook më 07.06.2024.
UP-ja thotë se mbetet e përkushtuar për ndërtimin e një shoqërie më të drejtë dhe më të barabartë, shoqëri që sfidon paragjykimet dhe promovon një mjedis, ku çdo zë dëgjohet dhe çdo këndvështrim vlerësohet.
Në fund UP-ja uron komunitetin LGBTQI+, me premtimein se do të punojë drejt një të ardhmes, ku të gjithë mund ta jetojnë të vërtetën e tyre hapur dhe me krenari.
Java e Krenarisë ka nisur që nga 03.06.2024. Që nga ajo ditë deri në përfundim të Javës së Krenarisë do të shënohen aktivitete nën moton “Kemi qenë dhe do t`jemi”.
Parada e Krenarisë në Prishtinë do të mbahet më 08.06.2024. Në të njëjtën ditë do të mbahet edhe Koncerti “Prishtina Pride:Krejt bashkë”, në të cilën do të performojë këngëtarja Vesa Luma.