Çerkica Rexhepi: Në vitin 1993 kam shku nuse në Pejë

Aktivistja Çerkica Rexhepi në emisionin “Kallxo Përnime” ka rrëfyer historinë e saj.

Rexhepi ka thënë se në vitin 1993 është martuar me një djalë në qytetin e Pejës.

Ajo ka thënë se me vullnetin e saj ka shkuar nuse dhe ka jetuar nëntë muaj me familjen e djalit në fjalë.

“Unë u martova në Pejë. U bëra nuse. Me vullnet jam martuar. Jam martuar me një djalë. I kam hyrë brenda djalit, me vello. Në vitin 1993. U martova, qëndrova aty nëntë muaj”, ka thënë  Rexhepi.

Ajo ka rrëfyer se nuk ka qenë e martuar zyrtarisht.

Çerkica Rexhepi tutje ka thënë se në atë kohë e kanë kërcënuar duke i thënë se do ta lajmërojnë në Polici për këtë çështje.

“Më kanë thanë që kanë me t’i thirrë policinë, Policia e atëhershmit si e kanë marrë vesh që je gay, t’i kanë thye këmbë e duar, të kanë lënë invalid”, thotë ajo.

Rexhepi teksa ka rrëfyer jetën e saj ka thënë se është kthyer në vendlindjen e saj në Fushë-Kosovë kur i kanë thënë se familja e saj e kanë kuptuar që Çerkica është martuar në Pejë.

“Më thanë që e kanë kuptu familja që janë martuar, edhe kanë me t’i sjell Policinë. Pas kësaj, mbas dy ditëve jam kthyer e jam ardhur në Fushë-Kosovë. Kur kam ardhur në Fushë-Kosovë vëllai ka dashtë me m’i hekë flokët. Ju thash që kam me dalë prej shtëpisë krejt dhe mos më lypni as me Polici, lërmëni rahat”, ka shpjeguar ajo.

Kuvendi i Kosovës në mars të këtij viti nuk e ka miratuar në shqyrtim të parë Projektkodin Civil të Republikës së Kosovës.

Në Projektkodin Civil për personat me sekse të njëjta thuhej se bashkësitë e regjistruara civile mes tyre janë të lejuara.

“Bashkësitë e regjistruara civile ndërmjet personave me sekse të njëjta janë të lejuara. Kushtet dhe procedura rregullohen me ligj të veçantë”, shpjegohet në Projektkod.

Sot në Prishtinë është mbajtur “Parada e Krenarisë”.

Qytetarë, aktivistë, deputetë të Kosovës e ambasadorë të vendeve të huaja kanë bërë thirrje që personat e komunitetit LGBTQI+ të pranohen për orientimin e tyre seksual.

Slogani i paradës për këtë vit ka qenë “EDHE N’SHTET, EDHE N’FAMILJE”, që ka synuar të pasqyrojë praninë dhe ekzistencën e mohuar të personave LGBTQI+ si në shtet, ashtu edhe në familje.