Foto: Urim Krasniqi/KALLXO.com
Besnik Krasniqi jep dorëheqje nga Njësia për Monitorim të Ndërmarrjeve Publike
Nga nesër, udhëheqësi i Njësisë për Politika dhe Monitorim të Ndërmarrjeve Publike në Ministrinë e Ekonomisë, Besnik Krasniqi nuk do ta drejtojë këtë institucion.
Ai, përmes një letre drejtuar ministres së Ekonomisë Artane Rizvanolli, ka paraqitur dorëheqjen nga pozita e drejtorit të Njësisë për Politika dhe Monitorim të Ndërmarrjeve Publike.
“Arsyeja e vendimit tim për dorëheqjen nga funksioni i ushtrimit të pozitës së udhëheqësit të Njësisë në kuadër të Ministrisë së Ekonomisë, vjen si rezultat i angazhimit tim profesional në fusha tjera, prandaj konsideroj se angazhimi im i mëtutjeshëm në këtë pozicion, nuk mund të jetë efektiv dhe në shtyrjen e proceseve karshi ndërmarrjeve publike”, thuhet në letrën e Krasniqit dërguar ministres Rizvavolli.
“Duke ju falënderuar për bashkëpunimin korrekt gjatë kësaj kohe të angazhimit tim në pozitën e lartcekur në drejtim të shtyrjes së përgjegjësive përpara, kërkoj mirëkuptimin tuaj në dorëheqjen e parevokueshme”, thuhet në fund të letrës të cilën e ka siguruar KALLXO.com.
Besnik Krasniqi erdhi në krye të Njësisë për Politika dhe Monitorim të Ndërmarrjeve Publike në korrik të vitit të kaluar me një mandat tre vjeçar.
Letra e dorëheqjes.