31 shtetet ku lejohet martesa në mes personave të gjinisë së njëjtë
Në një raport të The Human Rights Campaign Foundation (HRC Foundation), shihet se janë 31 shtete në botë të cilat lejojnë martesat me gjini të njëjtë.
“Aktualisht janë 31 vende ku martesat e të njëjtit seks janë të ligjshme: Argjentina, Australia, Austria, Belgjika, Brazili, Kanadaja, Kili, Kolumbia, Kosta Rika, Danimarka, Ekuador, Finlanda, Franca, Gjermania, Islanda, Irlanda, Luksemburgu, Malta, Meksika, Holanda, Zelanda e Re, Norvegjia, Portugalia, Afrika e Jugut, Spanja, Suedia, Zvicra, Tajvani, Mbretëria e Bashkuar, Shtetet e Bashkuara të Amerikës dhe Uruguai”, thuhet në raportin e HRC-së.
Sipas raportit 22 vende kanë legalizuar martesat e të njëjtit seks në nivel kombëtar përmes legjislacionit. Australia, Irlanda dhe Zvicra legalizuan martesat e të njëjtit seks përmes legjislacionit vetëm pas votimeve në mbarë vendin.
7 vende kanë legalizuar martesat e të njëjtit seks në nivel kombëtar përmes vendimeve gjyqësore – Austria, Brazili, Kolumbia, Kosta Rika, Ekuador, Meksika, Afrika e Jugut, Tajvani dhe Shtetet e Bashkuara të Amerikës. Ndërsa 2 vende, Afrika e Jugut dhe Tajvani, miratuan legjislacionin që legalizon martesat e të njëjtit seks pasi gjykatat i urdhëruan ta bënin këtë.
Vendet që legalizuan barazinë martesore në 2021: Kili, Zvicra. Vendi që e ka legalizuar barazinë martesore në 2020: Costa Rica. Vendet që legalizuan barazinë martesore në 2019: Austri, Taivan, Ecuador.
Gjykata Evropiane e Drejtësisë (GJED) që shërben si gjykatë e lartë në Bashkimin Evropian në vitin 2018, përcaktoi që të gjitha vendet e BE-së duhej të njihnin martesat e të njëjtit seks të qytetarëve të BE-së dhe jo-BE-së për qëllime imigrimi, pavarësisht nëse martesat e të njëjtit seks janë të ligjshme në ato vende.
Raportin e plotë e gjeni KËTU.
Ndryshe në seancën e djeshme me 28 vota për, 28 kundër dhe 4 abstenime, Kuvendi i Kosovës nuk e ka miratuar në shqyrtim të parë Projektkodin Civil të Republikës së Kosovës.
Sipas kryetarit të Kuvendit, Glauk Konjufca, 16 deputetë nuk kanë marrë pjesë fare në votim.
Ministrja e Drejtësisë, Albulena Haxhiu, ka thënë se ky Projektkod Civil është një ndër produktet më të mëdha legjislative pas Kushtetutës së Kosovës.
Ajo ka shpjeguar disa nga çështjet që janë adresuar në këtë Projektligj, i cili përmban pesë libra dhe 1,630 nene.
“Është adresuar çështja e pasurisë së bashkëshortëve në martesë dhe barazvlefshmëria e pasurisë në rast të divorcit, çështja e martesave, mbrojtja e fëmijëve, fejesa, trashëgimia dhe martesat e personave nga mosha 16 deri në 18-vjeç por edhe çështje tjera të rëndësishme”, ka thënë ministrja.
Haxhiu theksoi se sipas këtij Projektkodi është hequr mundësia që të lejohen martesat e hershme.
Tutje ajo tha se gjatë hartimit të Projektkodit kanë qenë pjesmarrës një grup i madh i ekspertëve dhe përfaqësues të institucioneve.
Në memorandumin shpjegues të Projektkodit Civil thuhet se qëllimi i tij është rregullimi dhe harmonizimi i dispozitave ligjore të së drejtës civile materiale.
Sipas memorandumit shpjegues, miratimi i këtij projektligji është i domosdoshëm për rregullimin parimor dhe material të së drejtës civile si dhe në thjeshtësimin e zbatimit të së drejtës civile nga autoritetet gjegjëse.
Tutje, në shpjegim thuhet se gjatë fazës së hartimit të draft Kodit Civil, janë marrë parasysh dhe janë konsultuar modelet e shumë kodeve civile të vendeve të Evropës.
“Gjatë fazës së hartimit të Draftkodit Civil, janë marrë parasysh dhe janë konsultuar modelet e shumë kodeve civile të vendeve të Evropës kontinentale e kryesisht të Kodit Civil gjerman, Kodit Civil austriak, Kodit Civil italian, Kodit Civil francez, Kodit Civil estonez dhe Kodit Civil të Shqipërisë. Po ashtu, janë marrë për bazë vendime të ndryshme gjyqësore në kuadër të gjykatave në BE”, bëhet e ditur në memorandum.
Këtu mund të gjeni të plotë procesin legjislativ të Projektkodit Civil të Republikës së Kosovës.
