Ilustrim - Foto: KALLXO.com
13-vjeçarja që dyshohet se u dhunua seksualisht nga dy persona, ishte raportuar si e zhdukur
Dy persona të rritur ranë në pranga të Policisë së Kosovës nën dyshimin se kanë kryer veprën penale “Dhunim” ndaj një të miture.
Siç është njoftuar edhe në raportin 24-orësh të Polisicë, viktima fillimisht ishte raportuar si person i zhdukur nga familjarët e saj në stacionin e Policisë në Suharekë.
Burime të KALLXO.com kanë bërë të ditur se viktima është e moshës 13-vjeçare, ndërsa njëri nga të dyshuarit është i moshës rreth 20-vjeçar.
Viktima u raportua si e zhdukur më 16.03.2024, ndërsa e njëjta u gjet vetëm dy ditë pas, në mbrëmjen e 18.03.2024 në qytetin e Vushtrrisë.
Pasi u gjet nga zyrtarët policor, 13-vjeçarja deklaroi se gjatë dy ditëve sa ka qenë e raportuar si e zhdukur ka qenë nën shoqërimin e dy personave të rritur, në kohë të ndryshme.
Për deklaratat e të miturës, zyrtarët më pas njoftuan edhe prokurori kujdestar, i cili ka urdhëruar që të hapet rast “Dhunimi”.
Raporti i Policisë ka bërë të ditur se njëri nga të arrestuarit është shoqëruar në zyret e policisë ku dhe është intervistuar në prezencë të avokatit mbrojtës.
Ai mësohet se e pranoi se kishte qenë në hotel me të miturën.
Policia ka thënë se dy të dyshuarit, pas intervistimit me vendim të prokurorit janë dërguar në mbajtje.
