Video e manipuluar e Thaçit duke qarë
Deklarata
Vlerësimi
Rrenë
Publikimi në të cilin paraqitet Hashim Thaçi kinse duke qarë është i rremë. Krypometër ka konfirmuar se Thaçi nuk është filmuar duke qarë deri më tani në ndonjë burg.
Artikulli
Më 1 nëntor 2023, faqja e Facebook-ut Sija Aldi Sera Durmishi (arkiva), ka shpërndarë një videomaterial në grupin >>Qeveria Kurti ll, 22 Mars 2021<<, në të cilin shihet ish-presidenti i Kosovës, Hashim Thaçi.
Materiali me 7 shpërndarje dhe mbi 20 reagime paraqet imazhin e Hashim Thaçit duke qarë brenda materialit ka edhe mbishkrime “Zdravo Zdravo”.
Krypometër ka analizuar dhe ka konstatuar se video është e edituar dhe se përmbanë disa ndërhyrje me emotikone dhe tekste të shkruara.
Për të verifikuar tutje informacionin, Krypometri ka kontaktuar edhe me Artan Behramin, këshilltar politik i ish-presidentit Thaçi, i cili ka deklaruar se videoja është manipuluar për qëllime të dezinformimit të opinionit publik.
“Video është e manipuluar, e montuar me qëllim te dezinformimit dhe manipulimit të opinionit publik”- tha Behrami për Krypometrin.
Hashim Thaçi, Kadri Veseli, Rexhep Selimi dhe Jakup Krasniqi po mbahen në paraburgim në Hagë prej nëntorit të vitit 2020.
Deri më tani, Gjykata ka refuzuar çdo kërkesë për mbrojtje në liri të ish-krerëve të UÇK-së.
Ata po akuzohen për krime lufte dhe krime kundër njerëzimit si përndjekje, burgosje, akte çnjerëzore, torturë, zhdukje dhe vrasje, si dhe me 10 pika për krime lufte si arrestim, ndalim arbitrar, torturë dhe vrasje të paligjshme.
