Reklamimi i suplementeve përmes portaleve fiktive

1 tabletë dita minus 7 kg jave!

Më 24.05.2024 faqja në Facebook ‘Fadeer Heter’(arkiva), ka publikuar një artikull me titull: “1 tabletë dita minus 7 kg jave!”

Kur klikon mbi të, linku të dërgon te një artikull në ueb faqen ‘beauty-cf2.tech’(arkiva).

Artikulli ka titullin: Si humba 23 kg në 8 javë pavarësisht problemeve të tiroides dhe punës sedentare. Rruga ime drejt peshës së ëndrrave.

Artikulli citon ‘Valentina Kapurani’, e cila thuhet se me këtë produkt ka humbur 23 kilogramë në 8 javë. Krypometër përmes kërkimit të fotografive në Google Lens ka gjetur se fotografitë që janë përdorë për ilustrimin e Valentina Kapurani janë përdorë për ilustrimin e grave që kanë humbur peshë.

Artikulli është publikuar në faqen ‘beauty-cf2.tech’(arkiva), e cila ka pamjen dhe dizajnin e një portali me emrin “Per Shendetin”, që ka rubrikat: Moda, Shëndeti, Bukuria, Dieta. Kur klikohet në cilëndo prej rubrikave apo titujve tjerë, linqet dërgojnë te dritarja që mundëson porositjen e këtij ilaçi.

Në këtë artikull është edhe një suplement me emrin: ‘SLIM FIT’.

Krypometër ka kontrolluar nëse produkti që promovohet përmes këtij shkrimi dhe kësaj faqeje të internetit bën pjesë në listën e produkteve me Autorizim për Marketing në Republikën e Kosovës dhe ka gjetur se produkti ‘Slim Fit” nuk bën pjesë në listën e produkteve me Autorizim Marketingu në kuadër të Agjencisë së Kosovës për produkte dhe pajisje medicinale.

Krypometër ka pyetur edhe dietologen dhe specialisten e mjekësisë, Dhurata Halabaku, e cila ka thënë se secili person ka metabolizëm të ndryshëm prandaj duhet të bëhen testi i intolerancës para se të caktohet një program për dobësim.

“Minimumi i kërkesës për një produkt që e konsumojmë është me i ditë vetitë e tij, përparësitë dhe ndikimet eventuale anësore, por edhe prodhuesin”- tha Halabaku.