Publikimi i rremë për vrasjen e Vlladimir Toliqit

Vlladimir Toliq është vrarë në aksionin e Banjskës

Më 25 shtator 2023, faqja në Facebook “Mitrovica Net” ka publikuar një fotografi të njërit nga pjesëtarët e grupit terrorist të dyshuar për sulmin e 24 shtatorit 2023 në Banjskë të Zveçanit, duke thënë se i njëjti është një nga të vrarët gjatë kundërsulmit që u bë nga Policia e Kosovës po atë ditë.

Faqja “Mitrovica Net” krahas fotografisë ka shkruar “Emri i terroristit tjeter te vrare eshte Vladimir Tolic nga Zveqani”. 

Krypometri më 25.10.2023 ka verifikuar nëse personi me emrin Vlladimir Toliq është i vrarë në aksionin e Banjskës.

Fillimisht, Krypometri konfirmoi me burime zyrtare nga Policia e Kosovës se të vrarët në sulmin e Banjskës janë Stefan Nedelkoviq, Igor Milenkoviq dhe Bojan Mijailoviq.

Në listën e të vrarëve nga Policia nuk figoron emri Vlladimir Toliq.

Krypometri ka verifikuar tutje dhe ka zbuluar se personi me këtë emër është person i plagosur në këtë rast.

Krypometri ka siguruar kërkesën me të cilën Prokuroria Speciale kërkonte paraburgosjen e Vlladimir Toliqit.

Në dosje thuhet se Toliq dhe Blagoje Spasojeviq, me një grup personash ende të paidentifikuar, në mënyrë të organizuar dhe të armatosur me armë të llojeve të ndryshme ushtarake, të rënda, me dashje, pasi që kanë hyrë ilegalisht në Kosovë, me dhjetëra vetura të mbushura me armatim, fillimisht kanë bllokuar rrugën me dy kamionë me qëllim të vënies në pritë të zyrtarëve të Policisë së Kosovës e pastaj i kanë sulmuar me granatë dhe armë të ndryshme. 

Vlladimir Toliq, ishte njëri nga të plagosurit gjatë një kundërsulmi në fshatin Banjskë të Zveçanit nga ana e Policisë së Kosovës. 

Ai u identifikua, u dërgua për trajtim mjekësor në Qendrën Klinike Universitare të Kosovës dhe seanca për caktimin e masës së sigurisë ndaj tij u mbajt në ambientet e QKUK-së. 

Madje, më 25 tetor 2023, banesa e Vlladimir Toliqit, e cila gjendet në Zveçan, është bastisur nga Policia e Kosovës.