Prishtinë, nga e hëna e ardhshme rikthehen kurorëzimet brenda sallës së ceremonive
29.6.2021 - 13:20
Nga e hëna e ardhshme do të kthehen ceremonitë e kurorëzimeve brenda sallës së ceremonive në Komunën e Prishtinës.
Këtë e ka konfirmuar Vasilika Zotaj, nga drejtoria e Administratës në një prononcim të shkurt për KALLXO.com
“Gjatë situatës së rëndë me COVID-19, martesat i kemi kryer në sportele vetëm më çiftin dhe dy dëshmitarë, ndërsa familjarët kanë pritur jashtë. Nga e hëna e tutje do lejohet kurorëzimi brenda sallës siç ka qenë më herët”, ka thënë Zotaj.
Nga qershori i vitit 2020, kurorëzimet në komunë janë kryer në sportele e jo në sallën e ceremonive për shkak të gjendjes me pandeminë.
Salla e ceremonive funksiononte tre herë në javë, e hënë, e mërkurë dhe premte, kurse është mbyllur që nga shfaqja e COVID-19.