Kuvendi i Kosovës (Arkiv) - Foto: KALLXO.com
Në Mungesë të Kuorumit, Nuk Ratifikohen Anëtarët e Bordit të Akreditimit
Në mungesë të kuorumit, deputetët e Kuvendit të Kosovës nuk ratifikuan anëtarët e Këshillit Shtetëror të Cilësisë së Agjencisë së Kosovës për Akreditim.
Ky institucion qe shtatë muaj është jashtë funksionit pasi që me vendim të kryeministrit Ramush Haradinaj, ministri i Arsimit, Shyqiri Bytyqi kishte shkarkuar bordin që kryesohej nga Blerim Rexha.
Në Kuvend ishin 48 deputetë, ku prej tyre 45 votuan pro ratifikimit ndërsa 3 të tjerë abstenuan, ndërsa nuk pati asnjë kundër.
“Janë 48 deputetë, 45 votuan për ndërsa 3 abstenuan. Nuk ka kuorum për votim andaj vazhdojmë me pikën e rendit tjetër të ditës”, tha nënkryetari i Kuvendit, Xhavit Haliti, i cili po udhëhiqte seancën plenare.
Para se të hidhej në votim, ministri i Arsimit Shyqiri Bytyqi kërkoi të ratifikohen anëtarët e Këshillit Shtetëror të Cilësisë pasi që sipas tij në këtë proces ka pasur transparencë.
“Tani kemi listën e plotë të Këshillit Shtetëror të Cilësisë të Agjencisë së Kosovës për Akreditim. Sot po kërkoj mbështetjen tuaj për ratifikimin e listës së ngushtë të Këshillit Shtetëror të Cilësisë”, tha ministri Bytyqi.
Ai tregoi se në këtë proces kanë aplikuar 35 kandidatë, ku prej tyre 16 kanë hyrë në listën e ngushtë, ndërsa 6 janë zgjedhur nga ai. Bytyqi tha se tre anëtarët ndërkombëtarë janë përzgjedhur nga ambasadat e huaja.
Ratifikimin e anëtarëve të Këshillit Shtetëror të Cilësisë e ka mbështetur edhe kryetari i Komisionit të Arsimit, Ismajl Kurteshi nga radha e Lëvizjes Vetëvendosje.
Edhe deputetja Teuta Haxhiu tha se kjo listë duhet të ratifikohet ndërsa propozoi që në të ardhmen përzgjedhja e anëtarëve të Këshillit Shtetëror të Cilësisë të bëhet me ligj.
