Kryetari i BIK-ut në Kaçanik Tregon pse Shkoi në Ngushëllime te Familja e Lavdrim Muhaxherit

Florim Neziraj, kryetar i Këshillit të Bashkësisë Islame në Kaçanik në një intervistë për KALLXO.com flet për vdekjen e Lavdrim Muhaxherit në Siri. Neziraj tregon se nga kush u njoftua për vdekjen e Muhaxherit, përshkruan njohjen me Lavdrimin dhe përshkruan familjen Muhaxheri.

Kryetari Neziri, tregon se për vdekjen e Muhaxherit është njoftuar nga familja e tij të cilët kanë bërë një kërkesë që BIK në Kaçanik t’i njoftojë qytetarët për vdekjen e tij.

NDËRLIDHUR

“Ne me të ardhur në punë në mëngjes kemi pranuar një kërkesë nga bashkëfamiljarët e Lavdrim Muhaxherit, për të njoftuar xhematin e xhamisë së Kaçanikut se ka ndërruar jetë Lavdrim Muhaxheri në Siri dhe ne me kërkesën e tyre e kemi bërë njoftimin në xhami dhe tani po vazhdon ceremonia e ngushëlllimit për familjen Muhaxheri në qytetin e Kaçanikut”, tha Neziraj.

Neziraj tha më tej se së bashku me imamë dhe qytetarë ishin në familjen Muhaxheri.

“Ne pas namazit të drekës i shoqëruar nga imamë dhe qytetarë të xhamisë së qytetit kemi vizituar familjen Muhaxheri, kemi ngushëlluar dhe të paktën me vëllain e tij një informacion të shkurtë që dje pasdite ka humbë jetën vëllai i tyre Lavdrim Muhaxheri dhe më shumë diçka informacione nuk kemi vetëm se kaq dihet por dihet nga vëllai i tij që më ka thënë se është sulmuar nga avion të ndryshëm dhe ka gjetur vdekjen në vend”, tha Neziraj.

Neziraj thotë se nuk e ka njohur Muhaxherin shumë por me aq sa e ka njohur nuk kishte vërejtur tek ai ndonjë sjellje të radikalizuar.

“Unë nuk kam pas rast ta takoj Lavdrimin, e kam parë dy ose tri herë në Kaçanik sepse kur kam ardhur unë ai veç se ka shkuar në Siri por në dy ose tri takime në xhaminë e qytetit, ai ka qenë një frekuentues apo një besimtar i mirë i xhamisë së qytetit dhe tek ai nuk kemi vërejtur asnjë shenjë të ekstremizmit edhe pse skam pasur rast ta njoh mirë por një e di që rrjedh nga një familje e mirë e qytetit të Kaçanikut”, tha Neziraj.

Duke shprehur keqardhjen për humbjen e jetës së një të riu nga Kosova, Neziraj thotë se Kosova nuk ka gjak për të derdhur.

“Ne nuk kemi fryt, nuk kemi gjak të njomë që të ujisim shkretëtirat e arabëve dhe të askujt tjetër sepse i madhi Allah na ka falur shqiptarë dhe myslimanë dhe ne duhet kontribuuar në vendin tonë në kombin tonë dhe në atdheun tonë”, tha Neziraj.

Neziraj tha se në tri vitet e fundit asnjë i ri nga regjioni i Kaçanikut nuk ka shkuar në Siri.

KALLXO.com ka provuar të kontaktoje edhe me familjarët e Lavdrim Muhaxherit por ata kanë refuzuar duke thënë se kanë dhimbjen e tyre dhe nuk duan të flasin.

Muhaxheri mori famë të keqe në Kosovë në vitin 2014 kur u fotografua duke mbajtur në dorë një kokë të prerë të një të riu në Siri.

Para se t’i bashkohej ISIS-it, ai punoi deri në vitin 2010 me trupat e KFOR-it, duke qenë pjesë e një operacioni mbështetës në kampin ushtarak Bondsteel afër Ferizajt.

Më vonë, ai u punësua në një kamp trajnimi të NATO-s në Afganistan.

Muhaxheri filloi të radikalizohet në vitin 2012 në qytetin e lindjes në Kaçanik dhe atë vit u raportua se shkoi për herë të parë në Siri si luftëtar.

Në vitin 2013, ai mori një pozitë komanduese brenda ISIS-it dhe u konsiderua si rekrutues i shqiptarëve të Kosovës si dhe inspirues i të tjerëve në Maqedoni e Shqipëri.

Më vonë, ai u pa në një video duke djegur pasaportën e Kosovës bashkë me disa luftëtarë të tjerë në Siri.

Emir i tij doli në kryetituj të lajmeve në nëntor 2016 kur policia e Kosovës dhe e Shqipërisë ndërmorën një operacion të gjerë në dy shtetet dhe arrestuan 19 persona të dyshuar se po planifikonin sulm terrorist kundër futbollistëve të Izraelit që kishin ardhur në Shqipëri për një ndeshje në kuadër të kualifikimeve për Kampionatin Botëror të Futbollit. Muhaxheri u tha se ka qenë organizator i sulmit.

08 Qershor 2017 - 19:06

Labinot Leposhtica, Naim Krasniqi 08/06/2017 - 19:06
NDËRVEPRIMI0