Adem Grabovci Dëshmitar i Prokurorisë në Gjykimin e Limajt

Adem Grabovci do të jetë dëshmitar i Prokurorisë në gjykimin e Fatmir Limajt dhe të tjerëve në rastin gjyqësor të njohur si MTPT.

Grabovci ka qenë zëvendësministër në Ministrinë e Transportit dhe Postë-Telekomunikacionit, të cilën e drejtonte Limaj.

Lajmin se Adem Grabovci do të dëshmojë në ditët e ardhshme në këtë proces gjyqësor e dha në seancën e sotme prokurori Charles Hardaway.

“Ky dëshmitar është shumë unik për të qenë në gjendje për të matur kohën se sa gjatë do ta marr në pyetje”, theksoi prokurori i këtij rasti Charles Hardaway.

Ndërsa, seanca e sotme nuk u mbajt për shkak se mbrojtja e të akuzuarve nuk e kishte pranuar dokumentin që përmbante listën e provave të parapranuara nga Prokuroria.

Ndonëse kryetarja e trupi gjykues, Maria Tuma, ua siguroi dokumentin e nevojshëm, avokatët thanë se nuk mund ta shikojnë për shkak se koha ishte shumë e shkurtër.

Seanca e radhës u caktua për më 15 shkurt.

Përpos Limajt të akuzuar janë edhe këshilltari i tij dhe njëkohësisht ish-shefi i Kabinetit, Endrit Shala, truproja i tij, Shpëtim Telaku, biznesmeni Florim Zuka dhe ish-shefi I prokurimit Nexhat Krasniqi.

Limaj këtë aktakuzë, që nga EULEX-i quhet e konsoliduar pasi në të janë bashkuar rastet “MTPT 1” dhe “MTPT 2”, më 30 tetor të vitit të kaluar e cilësoi të ngritur me urdhër politik.

http://kallxo.com/fatmir-limaj-kjo-aktakuze-eshte-ngritur-me-urdher-politik/

KALLXO.com ka raportuar në vazhdimësi për rastin kundër Limajt dhe të tjerëve. Raportet rreth këtij procesi mund t’i gjeni në këtë link.

Redaktoi: Naser Sertolli