Nga viti 2024 një karikues i vetëm do të përdoret për të gjithë telefonat, tabletët dhe kamerat në BE

Në njoftimin e bërë, Komisioni Evropian rikujtoi se nga viti 2024 të gjithë celularët, tabletët dhe kamerat në BE do të duhet të kenë të njëjtin karikues. Sloti USB-C, i njohur gjithashtu si USB Type-C, po bëhet një standard, që do të thotë se prodhuesit do të duhet t’i përshtatin pajisjet e tyre me kërkesat e reja.

Ky vendim, i cili u mbështet nga eurodeputetja e SDP-së, Biljana Borzan, është marrë disa vite më parë dhe Këshilli i BE-së së fundmi dha miratimin përfundimtar për futjen e detyrueshme të një karikuesi për të gjitha pajisjet elektronike.

“Pritja ka mbaruar. Nga viti 2024, USB-C do të jetë standardi për të gjitha pajisjet elektronike në BE. Që nga ai moment, ne nuk do të dëgjojmë më: ​​”Më falni, nuk e kam atë kabllo”, njoftoi Komisioni Evropian, duke theksuar se efektet pozitive tashmë janë të dukshme.

Pavarësisht shqetësimeve të shprehura në fund të vitit 2021, kur u njoftua vendimi, Apple tashmë filloi të shesë telefona celularë me një slot USB-C në BE këtë vit. Prodhuesit dhe shitësit kanë ende kohë për t’u përshtatur me rregullin e ri, i cili nuk hyn në fuqi menjëherë më 1 janar 2024.

“Deri në fund të vitit 2024, të gjithë telefonat celularë, tabletët dhe kamerat e shitura në BE do të duhet të pajisen me një port karikimi USB-C. Nga pranvera e vitit 2026, detyrimi do të shtrihet edhe për laptopët”, ka bërë të ditur Parlamenti Evropian në tetor të vitit të kaluar.

Rregullat e reja kanë si qëllim ta reduktojnë nevojën për të blerë karikues të ndryshëm për çdo pajisje, gjë që do të kursejë para, kohë dhe do të ndihmojë në reduktimin e mbetjeve elektronike.

Pavarësisht deklaratave skeptike, si ajo e Apple që ka frikë se kjo rregullore do ta kufizojë inovacionin, BE-ja beson se standardizimi i karikuesve USB-C do të ketë një ndikim pozitiv tek konsumatorët në të gjithë Evropën./Klix.ba

Përgatiti: Nuhi Shala