Automjetet Peugeot do të pajisen me asistent zanor bazuar në ChatGPT
Peugeot synon të ofrojë një chatbot me IA për blerësit e automjeteve të saj në Francë, Gjermani, Itali, Spanjë dhe Britani të Madhe, dhe më pas në gjysmën e dytë të vitit.
Një numër në rritje i prodhuesve të automjeteve, duke përfshirë Mercedes-Benz dhe Volkswagen, po i shtojnë asistentët zanorë të bazuar në ChatGPT me synimin për ta përmirësuar sigurinë rrugore dhe për t’i ndihmuar klientët.
“Është një funksion i ri që ju lejon të kontrolloni sistemet e automjetit duke i mbajtur duart në timon dhe duke e shikuar rrugën. Ai do të na ndihmojë t’u përgjigjemi pyetjeve dhe temave të ndryshme”- ka thënë Jerome Micheron, drejtor produkti në Peugeot.
Kur shoferi e aktivizon asistentin zanor “OK Peugeot”, ai do të jetë në gjendje t’u përgjigjet një sërë pyetjesh, nga navigimi deri tek ndërveprimi me pasagjerët për tema të ndryshme duke përdorur ChatGPT.
Mercedes-Benz është prodhuesi i parë i automjeteve që ofron një version të ChatGPT për klientët amerikanë në qershor, si pjesë e një testi beta tre-mujor. Kompania përdor gjetjet për ta përmirësuar teknologjinë përpara se ta ofrojë atë në tregje të tjera.
Volkswagen demonstroi asistentin e tij të ri zanor me fuqi ChatGPT në sedanin e ri elektrik ID.7 muajin e kaluar gjatë evenimentit të saj në Las Vegas. Ky asistent do të bëhet standard në shumë modele Volkswagen duke filluar nga tremujori i dytë i këtij viti./Klix.ba
Përgatiti: Nuhi Shala