Kurteshi: Rezultatet e PISA-s Pasojë e Qeverive të Pasluftës
Lëvizja “Vetëvendosje” sot mbajti konferencë për medie lidhur me rezultatet e testit PISA që i renditin nxënësit kosovarë në mesin e tri vendeve të fundit nga 72 shtete pjesëmarrëse.
Deputeti i VV-së Ismajl Kurteshi rezultatet e dobëta i lidhi me punën e pamjaftueshme të institucioneve qendrore e lokale dhe ndërhyrjet politike në fushën e arsimit.
“Kjo gjendje vjen si pasojë e mosangazhimit të duhur në fushën e arsimit të të gjitha qeverive të pasluftës, ndërhyrjes së politikanëve në fushën e arsimit, jo për ta ndihmuar atë, por për të përfituar politikisht,” tha Kurteshi.
KALLXO.com shkroi dje për rezultatet e testit PISA.
http://kallxo.com/testi-pisa-77-e-nxenesve-15-vjec-sdine-lexim/
Kurteshi më tutje në konferencë deklaroi se së pari të gjithë duhet ta pranojmë që gjendja në arsim është shumë e rëndë, por sipas tij ndryshimi i gjendjes nuk mund të bëhet me qeverinë aktuale.
“Kjo nuk mund të ndodhë me personazhet e qeverisë pronto, nuk mund të organizosh korrupsion dhe krim ne një vend dhe të ndërtosh arsim e sistem serioz të edukimit,” tha Kurteshi.
Ai rekomandoi edhe si të përmirësohet gjendja në arsim.
“Buxheti për arsim duhet të ndërrojë dhe të rritet, strategjitë e cilësisë nuk mund të funksionojnë nëse përgjegjësve për këtë gjendje nuk u ndahet përgjegjësi dhe ndëshkim ligjor,” tha Kurteshi.
Sot në mbledhjen e qeverisë ministri i Arsimit Arsim Bajrami e pranoi se gjendja në arsim nuk është e mirë dhe kërkoi më shumë buxhet për sektorin që drejton.
http://kallxo.com/bajrami-gjendja-ne-arsim-nuk-eshte-e-mire/
Në konferencë Kurteshi kërkoi krijimin e kushteve për fitimin e njohurive të nevojshme të nxënësve duke u siguruar biblioteka, laboratorë të punës pa të cilët deklaroi se nuk mund të studiohet shkenca.
Gazeta “Jeta në Kosovë” shkroi në vitin 2014 për gjendjen e shkollave në shumë vende të Kosovës.
Ndryshe nga Kurteshi, deputeti Mytaher Haskuka veçoi për mirë arsimin në Prishtinë, komunë që drejtohet nga Lëvizja “Vetëvendosje”.
“Komuna e Prishtinës është duke treguar shembullin më të mirë në arsim dhe shpresoj që edhe komunat tjera të marrin këto praktika nga Komuna e Prishtinës,” tha Haskuka.
Redaktoi: Bekim Muhaxheri