Ish-Zëvendëspresidenti i Katalonisë Mbetet në Paraburgim

Gjykata Supreme në Spanjë ka urdhëruar që ish-zëvendëspresidenti i Katalonisë, Oriol Junqueras të qëndrojë në paraburgim edhe për dy muaj, për shkak të rolit të tij në lëvizjen për pavarësi të këtij rajoni.

Në vendimin me shkrim, gjyqtarët kanë thënë ka rrezik që Junqueras të kryejë sërish veprat e njëjta nëse ai lirohet.

Junqueras akuzohet nga autoritetet spanjolle për rebelim, kryengritje dhe keqpërdorim të fondeve publike.

Ky vendim i Gjykatës Supreme spanjolle do të bëjë të pamundur që Junquereas të jetë i pranishëm në seancën e parë të Parlamentit të ri të Katalonisë, që është paraparë të mbahet më 17 janar.

Rajoni i Katalonisë, më 1 tetor 2017 mbajti referendumin për pavarësi. Ndonëse shumica votuan pro pavarësisë nga Spanja, autoritetet spanjolle nuk kanë njohur rezultatet e referendumit, të cilin Madridi zyrtar e ka quajtur të jashtëligjshëm. (REL)