Të akuzuarit për vjedhjen e materialit ndërtimor në vlerë mbi 10 mijë euro, u ballafaquan me të dëmtuarin
Vëllezërit Saramand dhe Driton Cufa, të akuzuar për vjedhje të rëndë në bashkëkryerje, dolën sot para gjyqtares së rastit Diana Sina, për t`u ballafaquar me deklaratën e të dëmtuarit Arian Dobruna.
Prokuroria, të njëjtit po i akuzon se kanë vjedhur material ndërtimor në vlerë mbi 10 mijë euro, nga i dëmtuari Arian Dobruna.
Sot, i dëmtuari Arian Dobruna tregoi me bindje të plotë se në depon e tij, i kishte parë dy të akuzuarit duke vjedhur.
Ai tha se është shumë i sigurt që kanë qenë të njëjtit dhe se gjysma e materialit që i është kthyer nga Policia, kishte qenë i dëmtuar.
Sipas të dëmtuarit Arian Dobruna në depon e tij ishin kryer disa vjedhje, për të cilat kishte dyshuar në të akuzuarit, sepse njëri prej tyre kishte punuar në atë depo, por i njëjti ishte i sigurt që vjedhja e fundit ishte kryer nga Saramand dhe Driton Cufa.
Në këtë rast pritet që të dëgjohen edhe dëshmitarë të tjerë.
I akuzuari Saramand Cufa, duke mohuar veprën penale të vjedhjes, kishte pohuar se materialin vetëm e kishte shitur, ndërsa i akuzuari Driton Cufa kishte thënë që nuk ka të bëjë as me vjedhje e as me shitje të materialit ndërtimor.
Sipas aktakuzës, në korrik të këtij viti në Gjakovë, që të dy kanë vjedhur material ndërtimor në deponë e të dëmtuarit Arian Dobruna.
