Gjykata e Prishtinës e liron nga akuza ish-drejtorin komunal të Fushë Kosovës, Maliq Berisha
Më 21.03.2025, Gjykata e Prishtinës ka shpallur Aktgjykim lirues ndaj ish-zyrtarit të Komunës së Fushë-Kosovës, Maliq Berisha.
Maliq Berisha është liruar nga akuza për “keqpërdorim të pozitës apo autoritetit zyrtar”, pasi që nuk është vërtetuar se e ka kryer ketë vepër penale.
Ky Vendim është marrë nga Trupi Gjykues, i përbërë nga Gent Beka (Kryetar i Trupit Gjykues) dhe Fatime Dërmaku dhe Gëzim Ademi.
Palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë, në afat brenda 30 ditësh.
Dosja e Prokurorisë
Sipas Aktakuzës, më 29.01.2024, i pandehuri Maliq Berisha akuzohet se nga data 01.01.2014 në vazhdimësi deri më datë 12.08.2022 në Fushë Kosovë, në cilësinë e personit zyrtar, si Drejtor i Shërbimeve Publike dhe Mjedisit në Komunën e Fushë Kosovës, me qëllim të përfitimit të dobisë pasurore për personin tjetër me dashje dhe dijeni ka keqpërdorur autoritetet e tij ligjore, duke mos vepruar në pajtim me legjislacionin për nëpunësit civil, sa i përket shtesave për rrezikshmëri në punë.
Në Aktakuzë thuhet që zyrtarit komunal të Fushë Kosovës, Halil Berisha, i punësuar në pozitën e zyrtarit të Logjistikës dhe Autoparkut, më 01.01.2014, i ka mundësuar përfitim të kundërligjshëm pasuror, në kundërshtim me Ligjin për Pagat e Nëpunësve Civil – shtesat për kushte specifike të punës.
Sipas Aktakuzës, i pandehuri Maliq Berisha përkundër obligimeve ligjore që kishte si epror i tij, nuk kishte marrë veprime për ndërprerjen e kësaj pagese për zyrtarin Halil Berisha, të cilën i njëjti e kishte pranuar kundërligjshëm që nga muaji janar i vitit 2014 e deri më 12.08.2022, kur këto shtesa ishin ndërprerë pas inicimit të procedurës penale nga ana e Prokurorisë së Shtetit, e pastaj edhe pas kërkesës së të pandehurit për ndërprerjen e kësaj pagese.
Sipas Dosjes së Prokurorisë, i pandehuri Maliq Berisha buxhetit të Republikës së Kosovës i ka shkaktuar dëm financiar në shumën prej 11,128.00 euro.
Me këtë, sipas Prokurorisë i pandehuri Maliq Berisha në vazhdimësi e ka kryer veprën penale “keqpërdorimi i pozitës apo autoritetit zyrtar”.
Të gjitha raportimet e tjera, lidhur me këtë rast, mund t’i gjeni në këtë: LINK.
