Edhe dy muaj paraburgim ndaj 5 të pandehurve që dyshohet se planifikuan vrasjen e dy personave në Pejë

Gjykata e Prishtinës ua ka vazhduar masën e paraburgimit edhe për 2 muaj 5 të pandehurve D.R., R.B., Sh.K., F.Q., dhe D.M., të cilët dyshohet se kishin planifikuar dhe ndërmarrë veprime përgatitore për kryerjen e veprave penale – vrasje, dhe – shkaktim i rrezikut të përgjithshëm.

Këtë për KALLXO.com e ka konfirmuar zëdhënësja e Gjykatës së Prishtinës, Mirlinda Gashi.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve D.R., R.B., SH.K., F.Q., dhe D.M., Gjykata Themelore në Prishtinë – Departamenti Special me datë 21.03.2025 ka marr Aktvendim dhe ka aprovuar kërkesën e PSRK-së, ashtu që masa e paraburgimit të pandehurve D.R., R.B., SH.K., F.Q., dhe D.M., iu vazhdohet në kohëzgjatje prej 2 (dy) muaj, për secilin” – thuhet në përgjigjen e zëdhënëses së Gjykatës, Mirlinda Gashi.

Gjykata e Prishtinës për herë të parë kishte caktuar masën e paraburgimit ndaj të pandehurve më 23.02.2025.

D.R., R.B., SH.K., F.Q., dhe D.M. po dyshohen për veprën penale – pjesëmarrja ose organizimi i grupit kriminal të organizuar lidhur me veprën penale – veprimet përgatitore për vrasje të rëndë.

Më 22.02.2025, KALLXO.com ka raportuar se Drejtoria për Hetimin e Krimit të Organizuar dhe Prokuroria Speciale e Kosovës kanë arrestuar pesë persona, të cilët, sipas forcave të rendit, kishin planifikuar vrasjen e dy personave në Pejë.

Arrestimi i tyre u krye më 21.02.2025.

“Mbrëmë me datë 21.02.2025, është realizuar operacioni policor për arrestimin e ‘Grupit të Organizuar Kriminal’ të cilët kishin planifikuar dhe ndërmarr veprime përgatitore për kryerjen e veprës penale ‘Vrasje’ dhe dhe ‘Shkaktimit të Rrezikut të Përgjithshëm’ ndaj dy viktimave në Pejë” – thuhej në njoftim.

“Operacioni policor ka rezultuar me arrestimin e pesë persona të dyshuar: D.R., R.B., SH.K., F.Q., dhe D.M. të cilët me vendim të prokurorit nga PSRK janë ndaluar për 48 orë” – vijon njoftimi.

Policia kreu bastisje në gjashtë lokacione në ndryshme.

“Janë gjetur dhe sekuestruar armë të cilat do të përdoreshin për kryerjen e veprave penale si: granata dore, pushkë, revole dhe municion i kalibrave të ndryshëm. Përveç kësaj janë gjetur dhe sekuestruar një sasi e lëndës narkotike, telefona celularë si dhe dëshmi të tjera materiale, të cilat do të përdoren në procedurën penale ndaj të dyshuarve” – thuhej po ashtu në njoftim.