Von Cramon e quan blof deklaratën e Vuçiq se Serbia mund të largohet nga Këshilli i Europës

Raportuesja për Kosovën në Parlamentin Europian, Viola von Cramon ka quajtur blof deklaratën e Presidentit serb, Aleksandar Vuçiq se Serbia mund të tërhiqet nga Këshilli i Evropës, nëse Kosova pranohet më këtë organizatë.

“Një blof sigurisht. Sigurisht që Serbia nuk do të largohet. Deklarata (e Vuçiq) nuk duhet t’i bëjë përshtypje askujt” – ka shkruar von Cramon në rrjetin social X.

Ajo ka thënë se anëtarët e Këshillit të Evropës do të vendosin vetë se kë do të pranojnë.

“Nuk e di se çfarë flet kundër anëtarësimit të Kosovës. Serbia nuk është larguar nga UEFA dhe FIFA; shumicës së njerëzve në Serbi thjesht nuk u intereson. Përveç para zgjedhjeve, kur është ngritur nga disa zëra kombëtarë” – ka shtuar anëtarja e Parlamentit Europian.

Natürlich ein Bluff. Natürlich wird Serbien nicht austreten.
Das Gerede sollte niemanden beeindrucken.

Die Mitglieder des Europarats werden selbst entscheiden, wen sie aufnehmen. Ich wüsste nicht, was gegen die Mitgliedschaft von Kosovo 🇽🇰 sprechen sollte. https://t.co/5zv2vhrEln

— Viola von Cramon 🇺🇦🇪🇺🇮🇱 (@ViolavonCramon) March 23, 2024

Presidenti Vuçiq ka thënë të premten (22.03.2024) se Kosova me siguri do të pranohet në Këshillin e Europës dhe paralajmëroi se Serbia mund të tërhiqet nga kjo organizatë nëse ndodh një gjë e tillë.

“Do të jetë e vështirë për ne ta parandalojmë këtë, sepse ata e morën atë vendim” – ka thënë Vuçiq për televizionin serb Prva.

Ai ka shtuar se do të shohin nëse Serbia do të qëndrojë në Këshillin e Europës.

Kosova ka aplikuar më 12 maj 2022 për anëtarësim në Këshillin e Evropës. Për të t’u anëtarësuar në këtë organizatë, Kryeministri i Kosovës, vendosur ta zbatojë vendimin e Gjykatës Kushtetuese për pronat e Manastirit të Deçanit, anipse tha se nuk i pëlqen ai “vendim i çuditshëm e i padrejtë”.

Kjo për shkak se ndërkombëtarët kanë kushtëzuar ecjen tutje të Kosovës drejt anëtarësimit në Këshillin e Evropës me zbatimin e këtij vendimi.

Më 19.05.2016, Gjykata Kushtetuese e Kosovës kishte vendosur që Manastirit të Deçanit t’i ktheheshin 24 hektarë tokë. Problematika e kësaj tokës nisi në vitin 1946, kur Manastiri i Deçanit u shpronësua nga disa ngastra toke.

27 vjet më parë, Qeveria serbe me Sllobodan Millosheviqin në krye, lidhi një marrëveshje me Manastirin e Deçanit me të cilën këtij manastiri i fali 24 hektarë tokë. Toka në fjalë, atë kohë kishte qenë në pronësi të ndërmarrjeve shoqërore “APIKO” dhe “Iliria”, njëra hotel e tjetra fabrikë e mjaltit.

Aplikacionin e Kosovës për anëtarësim shqyrton Komiteti i Ministrave dhe pas shqyrtimit të gjendjes në Kosovë, fjalën përfundimtare e jep Asambleja Parlamentare e cila përbëhet nga përfaqësuesit kombëtarë të shteteve anëtare. Pranimi bëhet me votat e 2/3 të shumicës.

Këshilli i Europës është një organizatë ndërkombëtare për të drejtat e njeriut, demokracinë dhe sundimin e ligjit në Europë, me seli në Strasburg të Francës.

Kjo organizatë luan rol të rëndësishëm në procesin e zgjerimit të Bashkimit Europian duke mbështetur vendet e interesuara në kryerjen e reformave në përputhje me standardet e të drejtave të njeriut, demokracisë dhe shtetit të së drejtës, për aq sa këto reforma janë të nevojshme për mbylljen e zgjerimit.