Sulmohet ekipi i Lajmi.net në Shtime, reagon AGK-ja
Asociacioni i Gazetarëve të Kosovës ka bërë të ditur se sot është sulmuar fizikisht kameramani i portalit Lajmi.net në Shtime.
AGK janë shprehur të shqetësuar me rastin në fjalë, dhe kanë sqaruar rrethanat sesi ka ardhur deri te sulmi.
“Asociacioni i Gazetarëve të Kosovës me shqetësim ka marrë informatën se kameramani i portalit Lajmi.net është sulmuar fizikisht përderisa po xhironte aksionin e KRU Prishtina për shkyçjen e borxhlinjve nga rrjeti i ujësjellësit në Shtime”- thuhet në postimin në facebook.
“Në pamjet e publikuara shihet se si një person i fyen dhe shanë gazetarët që kanë shkuar ta përcjellin ngjarjen, përderisa zyrtarët e Policisë së Kosovës e largojnë dhe i thonë të mos përdorë gjuhë të tillë”- thuhet tutje aty.
“Gjatë momentit të incizimit, një person e ka shtyrë kameramanin tonë në prani të Policisë së Kosovës. Madje edhe gazetarit që ishte duke përcjellë këtë ngjarje, Zgjim Sefës, i njëjti ka tentuar t’ia marrë mikrofonin”, thuhet në raportimin e Lajmi.net, përcjell AGK.
Asociacioni i Gazetarëve të Kosovës i ka bërë thirrje Policisë së Kosovës që të hetojë rastin në mënyrë që mediet të ushtrojnë profesionin e tyre pa u penguar.
