Sulmi me armë kundër Policisë në Ferizaj, të dyshuarit ende nuk janë kapur
Jetët e zyrtarëve policorë në Ferizaj u rrezikuan sot në mëngjes pasi në drejtim të tyre u gjuajt me armë zjarri.
E gjithë ngjarja ndodhi rreth orës 4:50 gjatë një tentim grabitjeje të armatosur te pika e karburantit të “Hib Petrol” në magjistralen Ferizaj-Prishtinë.
Kanun Veseli, zëdhënës i Policisë së Rajonit të Ferizajt, tregoi se të dyshuarit kanë shtënë me armë zjarri në drejtim të patrullës së Policisë.
Sipas Veselit, kolegët e tij nuk pësuan lëndime por vetura zyrtare u dëmtua.
Ndonëse policët i ishin përgjigjur me zjarr të dyshuarve, ata arritën të largohen nga vendi i ngjarjes me një veturë.
Dyshimet e para thonë se në këtë veturë që iku në drejtim të panjohur dyshohet se ishin 4 persona me armë të gjata.
Siç tha Veseli për KALLXO.com, të dyshuarit janë ende në kërkim, e se është duke u punuar në drejtim të identifikimit të tyre.
Në një njoftim zyrtar të Policisë, rasti është iniciuar si vrasje e mbetur në tentativë, grabitje e armatosur e mbetur në tentativë dhe armëmbajtje pa leje.
Në vendin e ngjarjes, siç njoftohet, u dërguan edhe ekipe të tjera të Policisë, që i dolën në ndihmë patrullës që u sulmua, e më pas në vend të ngjarjes dolën edhe hetuesit e krimteknikët rajonalë.
Po ashtu, në vendin e ngjarjes dolën edhe Njësia e Deminimit e Policisë së Kosovës.
Hetimet e para të hetuesëve rajonalë kanë mësuar se cak i personave të maskuar ishin 3 bankomatet që gjenden skaj rrugës magjistrale në parkingun e qendrës tregtare “Super Viva” në Ferizaj.
Siç njoftohet, personat e maskuar fillimisht me një mjet plasës kanë shpërthyer njërin bankomat, ndërsa kanë dëmtuar edhe dy bankomatët e tjerë.
Nga të dyshuarit në këtë rast janë përdorur mjet eksplozivi në bankomat dhe pushkë automatike në drejtim të policëve.
VIDEO – Momenti kur grabitësit sulmojnë me armë zjarri Policinë e Kosovës
