Sot mbahet pjesa e dytë e provimit të maturës për afatin e dytë

Sot pritet të mbahet pjesa e dytë e Provimit të Maturës Shtetërore për afatin e dytë.

Pjesa e parë e këtij provimi, për afatin e dytë ishte mbajtur më 30 gusht.

Ministria e Arsimit pas mbajtjes së pjesës së parë të këtij provimi, kishte njoftur se Komisioni Shtetëror i Maturës ka analizuar raportet nga terreni për ecurinë e pjesës së parë të provimit të Maturës Shetërore (afati i dytë), i cili sipas tyre ka përfunduar me sukses.

“Komisioni ka konstatuar se në përgjithësi testi ka shkuar mirë dhe nuk ka pasur parregullsi të mëdha. Në bazë të të dhënave nga pjesa e parë, rezulton se për shkak të posedimit dhe përdorimit të telefonave dhe mospërfilljes së rregullave tjera të këtij procesi, janë përjashtuar nga procesi 45 nxënës, ndërsa ka filluar procedura disiplinore ndaj një administruesi”, ka njoftuar MASHT.

KALLXO.com kishte raportuar se në mbajtjen e pjesës së parë të provimit të maturës për afatin e dytë, njësoj si në afatin e parë, nxënësit janë përkujdesur që pyetjet e testit t’i publikojnë online.

Edhe pse Ministria e Arsimit ka deklaruar se ky proces ka përfunduar me sukses, nxënësit kanë postuar pyetjet me përgjigje, por edhe duke kërkuar përgjigje për to në grupin e hapur në Facebook të quajtur Testi i Maturës 2019.

Në afatin e parë të këtij testi kalueshmëria e testit ishte 64.64%, si dhe  janë larguar 270 nxënës, kurse për 8 administures janë marrë masa.

Pavarësisht se Ministria e Arsimit, Shkencës dhe Teknologjisë kishte paralajmëruar masa të rrepta për Testin e Maturës, edhe këtë vit ky test ka rrjedhur online.

Sërish rrjedh testi i maturës online, MAShT thotë se do të anulohen