Sekiraqa flet nëse ishte ngatërruar me Triumfin për Adelina Ismailin?

“Unë nuk kam pas asnjë arsyje, as motiv, as shkas, për asnjë send më të vogël me pas problem të çfarë do llojit me të ndjerin Triumf Riza, larg qoftë, me mendu apo me nxitë, apo organizu vrasjen e një polici të Kosovës”.

Enver Sekiraqa i akuzuar për nxitje në rastin e vrasjes së policit Triumf Riza në vitin 2007 u ul sot në bankën e të akuzuarve në Gjykatën e Prishtinës, seancë në të cilën i njëjti dha mbrojtjen e tij.

Sekiraqa u përgjigj në pyetjet e anëtarëve të trupit gjykues të përbërë prej kryetarit Agim Kuçi dhe anëtarëve Ngadhnjim Arrni dhe Medije Bytyqi.

Ndërkaq pyetje nuk i parashtruan prokurori i rastit Shpëtim Peci, avokatja mbrojtëse e tij Kosovare Kelmendi, e as i dëmtuari Shefqet Riza, babai i të ndjerit Triumf Riza.

Gjatë mbrojtjes së tij Sekiraqa u deklarua rreth raporteve të tij me të ndjerin Triumf Riza si dhe me të dënuarin për vrasjen e tij Arben Berisha.

Lidhur me Arben Berishën, në pyetjen e gjyqtarit Ngadhnjim Arrni, Sekiraqa deklaroi se nuk e ka njoftë pothuajse fare dhe nuk e ka lidhur asgjë me të.

“Arben Berishën unë nuk e kam njohur thuajse fare, ai ka qenë një gjeneratë shumë më e re se unë dhe mua asgjë s`më ka lidhur me të, kurrëfarë pune apo biznisi apo pazari apo lidhje familjare” – tha Sekiraqa.

Ndërkaq përmendi edhe faktin se i dënuari Berisha ka pasur shoqëri me tani të dyshuarin për vrasjen e Rizës – Ilir Abdullahu, i cili tashmë ndodhet në paraburgim.

“Unë me Arben Berishën nuk jam shoqëru kurrë, me të janë shoqëruar dajtë pak, Rrahim Abdullahu dhe Ilir Abdullahu”.

Ndërsa për Triumf Rizën ai rrëfeu një ngjarje ku sipas Sekiraqës ky i fundit e kishte shpëtuar nga më e keqja.

“Problem me Triumfin në të cilin ka marrë pjesë edhe ai është problemi i Swiss Casinos i cili ka ndodhë kah fundi i vitit 2005, atë problem e ka filluar A. S… Ju e dini shumë mirë se unë vetë kam deklaruar para jush dhe shumë vite më parë para trupit gjykues tjetër dhe para prokurorit se Triumfi në atë rast më ka shpëtu nga më e keqja, nga plumbat”- u shpreh Sekiraqa.

“Unë kurrë nuk e harroj se kam mujt aty unë me qenë i vdekur, ai më ka ngreh për jakne mirëpo ajo ka qenë shpëtimi im”- shtoi ai më tutje.

Pyetje i parashtroi edhe kryetari i trupit gjykues Agim Kuçi, një prej të cilave pyetje kishte të bënte me motivin e kryerjes së veprës për të cilën ai akuzohet.

“Unë nuk kam pas asnjë arsye, as motiv, as shkas, për asnjë send më të vogël me pas problem të çfarë do llojit me të ndjerin Triumf Riza, larg qoftë, me mendu apo me nxitë apo organizu vrasjen e një polici të Kosovës”- tha Sekiraqa

E kështu e mohoi edhe se ka ndonjë motiv që lidhet me këngëtaren Adelina Ismaili, e cila ka dëshmuar në gjykimet për këtë rast.

“Motivi për të cilin flitet se kinse unë jam kapur me Triumfin për shkak të Adelinës nuk ekziston as nuk ka ekzistuar kurrë”- u shpreh ai.

Seanca e radhës u caktua të mbahet më datë 7 dhjetor.

Kujtojmë që Sekiraqa ishte shpallur fajtor dy herë nga Gjykata e Prishtinës.

Herën e parë ( 17.05.2016) i njëjti ishte dënuar me 37 vite dënim me burgim kurse herën e dytë ishte dënuar ( 16.09.2019) me 30 vite dënim me burgim.

Çfarë thotë aktakuza?

KALLXO.com kishte siguruar akuzën e parë me të cilën ngarkohet i pandehuri Enver Sekiraqa, në të cilën shpjegohet në detaje se si kishte ardhur deri te vrasja e Triumf Rizës që u krye nga Arben Berisha, njeriu i besueshëm i Sekiraqës.

Në këtë akuzë thuhet se më 30 gusht 2007 në Prishtinë, Enver Sekiraqa ka nxitur Arben Berishën që të privonte nga jeta Triumf Rizën, i cili shërbente si zyrtar policor më Shërbimin Policor të Kosovës.

Dosja e siguruar nga KALLXO.com thotë se katër të akuzuarit këtë e kanë bërë në mënyrë shumë mizore dhe mashtruese për shkak të një hakmarrjeje të paskrupullt apo ndonjë motiv tjetër.

“Respektivisht hakmarrje personale kundër të përmendurit Triumf Riza” – thuhet në akuzë.

Akuza shpjegon se si para vrasjes, grupi në fjalë, pra katër të akuzuarit, kanë bashkëpunuar mes vete dhe kanë përcjell lëvizjet e Rizës me qëllim që të ndiqnin rrugët e tij.

Ky mesazh, sipas akuzës që është siguruar nga KALLXO.com i referohej viktimës Triumf Riza, banesa e të cilit thuhet se ishte në anën e kundërt të rrugës ku gjendej kafeneja “Sekiraqa”, e i cili në atë kohë gjendej në hotelin “Grand” të Prishtinës.

Me të pranuar këtë SMS, akuza thotë se Arben Berisha, Rrahim Abdullahu dhe Ilir Abdullahu, duke e vozitur makinën e këtij të fundit, që ishte e tipit “Passat”, kanë shkuar në kafenenë “Queens”

Në këtë kafene, Arben Berisha u tha se është futur i armatosur me ‘Glock’ të kalibrit 9×19, përderisa dy të tjerët, pra Rrahim e Ilir Abdullahu vazhdojnë në një kafene tjetër me qëllim që ta prisnin Triumf Rizën.

Akuza tregon se Arben Berisha kishte vrapuar pas tij dhe kishte shtënë me 11 plumba pa kurrfarë paralajmërimi apo provokimi.

Tre prej plumbave të shkrepur kishin goditur Triumf Rizën duke e plagosur atë për vdekje.

“Mënyra e vrasjes ka qenë mizore dhe mashtruese pasi që ka qenë e para-planifikuar dhe është ekzekutuar nga një grup kundër një viktime të pambrojtur e që është qëlluar nga prapa” – thuhet në akuzë kundër Enver Sekiraqës.

Triumf Riza, sipas kësaj akuze është vrarë pasi gjatë viteve që kanë shpirë deri të vrasja e tij, ai kishte qenë shënjestër për hakmarrje.

Në vitin 2004, Riza ishte shoqëruar me Adelina Ismajlin, e që akuza thotë se që nga vitin 2003 ajo kishte qenë duke vuajtur në duart e të pandehurit e të bandës së tij pasi që Enver Sekiraqa shpesh e kishte kërcënuar atë.

Madje, akuza thotë se në shumë raste, Sekiraqa e kishte detyruar Adelina Ismjalin t’i jepte atij shuma të ndryshme parash që varionin nga qindra euro deri në 9 mijë euro.

Po ashtu, akuza tregon se më 24 dhjetor të vitit 2005, në një klub nate të quajtur “Sëiss Casino” në Prishtinë, kishte ndodhur një përleshje e dhunshme në mes të Triumf Rizës dhe bandës së Enver Sekiraqës.

Në këtë përleshje kishte pasur edhe të shtëna armësh dhe ishin lënduar një numër individësh. Në këtë incident është thënë se është lënduar edhe vet Enver Sekiraqa, i cili ishte shtruar në spital, si rezultat i incidentit të dhunshëm me të ndjerin.

Ky incident, sipas akuzës, ka shtyrë Enver Sekiraqën që aktivisht të kërkojë hakmarrjen kundër Triumf Rizës

Për këtë, i pandehuri gjithashtu fajëson Triumf Rizën duke besuar se ai i kishte inkurajuar kolegët e tij policor që të sulmonin Sekiraqën.

Akuza thotë se duke qenë se ishte në kërkim të hakmarrjes dhe i inatosur me veprimet e Triumf Rizës, në periudhën deri te vrasja e tij, Enver Sekiraqa dhe banda e tij shumë shpesh e kanë ndjekur atë me makina duke përpjekje për ta lënduar dhe frikësuar.

Po ashtu, akuza thotë se pretendohet se Enver Sekiraqa e kishte orkestruar vrasjen e Triumf Rizës, duke e organizuar bandën e tij që ta ndiqnin Triumf Rizën dhe duke e nxitur Arben Berishën, i cili ishte personi i tij i besuar brenda grupit që të shtinte të shtënat e vrasjes.

Triumf Riza tregohet se asnjëherë nuk kishte pasur ndonjë problem me Arben Berishën, por vetëm me Enver Sekiraqën.