Rryma në veri të Kosovës më e lirë se në jug, ZRRE-ja nuk i përcakton tarifat për katër komunat veriore

Për gati 25 vjet, qytetarët në katër komunat veriore të Kosovës nuk kanë paguar për energjinë elektrike të shpenzuar.

Faturimi në këtë pjesë ka filluar veç në shkurt të vitit 2024, por pjesa më e madhe e qytetarëve vazhdojnë të mos e paguajnë.

Shkalla e pagesës që nga shkurti i vitit 2024 e deri në dhjetor të po këtij viti për Mitrovicë të Veriut, Zveçan, Zubin Potok dhe Leposaviq është veç 19%.

Përveç kësaj, tarifat e energjisë elektrike që aplikohen për komunat veriore janë më të ulëta sesa ato për komunat e tjera të Kosovës.

KALLXO.com më 21.03.2025 ka qenë në objektin e kompanisë “Elektrosever” në Mitrovicë të Veriut për të biseduar me dikë nga zyrtarët rreth tarifave që aplikohen në këtë pjesë të vendit, por një gjë e tillë nuk ka qenë e mundur. Zyrtarët këtu kanë hezituar të flasin para kamerës, teksa prapa saj thanë se të gjitha të dhënat janë në ueb-faqe të kompanisë.

Sidoqoftë KALLXO.com ka siguruar një kontratë që kompania “Elektrosever” e ka nënshkruar me konsumatorë të veriut.

Bazuar në këtë kontratë, tarifa e cila aplikohet për pjesën veriore për konsumatorët e bllokut nën 800 kilovatë është 7.40 centë, krahasuar me tarifën që aplikohet në komunat e tjera të Kosovës që është 7.79 centë. Kurse tarifa e ulët për katër komunat veriore është 3.17 centë, krahasuar me 3.34 centë.

Shtrenjtimi i paralajmëruar i energjisë elektrike për 15% nuk do t’i prekë edhe katër komunat veriore, kjo pasi që Zyra e Rregullatorit të Energjisë nuk i përcakton tarifat për Mitrovicë të Veriut, Zveçan, Zubin Potok dhe Leposaviq. Kjo u konfirmua nga ZRRE-ja.

“ZRRE-ja nuk miraton tarifat për furnizuesin ‘Elektrosever’, i cili ka licencë për furnizim vetëm në katër komunat veriore të vendit, pra furnizuesi ‘Elektrosever’ është furnizues komercial i energjisë elektrike, siç janë edhe furnizuesit tjerë të energjisë elektrike, të cilët mund t’i gjeni në regjistrin e furnizuesve të energjisë elektrike në faqen elektronike të ZRRE-së. Sipas raporteve konsultative të publikuara, është e pritshme që tarifat për shfrytëzimin e rrjetit të shpërndarjes dhe transmetimit të kenë rritje. Si të tilla, ‘Elektrosever’ pritet të paguajë tarifa më të larta për shfrytëzimin e rrjetit të shpërndarjes. Megjithatë, si do të reflektohen këto rritje në tarifat përfundimtare që do të paguajnë konsumatorët e furnizuar nga ‘Elektrosever’, është jashtë kompetencës së ZRRE-së.” – thuhet në përgjigjen e ZRRE-së më 21.03.2025.

‘Elektrosever’ u licencua nga Zyra e Rregullatorit për Energji në vitin 2022, pas dakordimit në Bruksel.

Pronare e ndërmarrjes “Elektrosever” është kompania publike serbe për prodhimin, furnizimin dhe tregtimin e energjisë elektrike, “Elektroprivreda Srbije”, me 100% të aksioneve.

Në anën tjetër, Kosova është pavarësuar nga tregu energjetik me Serbinë. Pas pavarësimit, Republika e Kosovës do të kontrollojë kufijtë e vet energjetikë, duke dalë përfundimisht nga blloku rregullues SMM (Serbi, Mali i Zi dhe Maqedoni e Veriut) dhe duke iu bashkuar Bllokut Rregullues të Sistemeve Energjetike Kosovë-Shqipëri.

Deri te kjo ka ardhur pasi ishte votuar Marrëveshja e re e Kyçjes në mes të Operatorit të Sistemit të Transmisionit dhe Tregut të Energjisë Elektrike të Kosovës (KOSTT) dhe Rrjetit Europian të Operatorëve të Sistemit të Transmisionit për Energji (ENTSO).

Nga viti 1999 deri më 2017, borxhin për veriun e Kosovës e kanë paguar qytetarët e komunave të tjera të Kosovës. Faturat e tyre kanë qenë më të larta për 3.5 për qind.

Megjithatë, pas ankesave të shumta, Gjykata e Apelit e Kosovës ka vendosur në fund të vitit 2017 për pezullimin e kësaj praktike, duke konstatuar se është e paligjshme.

Ky vendim më vonë është konfirmuar nga Gjykata Kushtetuese e Kosovës dhe pagesa ka kaluar te KOSTT-i deri në shkurt te vitit 2024.