Polici që vdiq në ndejën në Zllatar u godit nga një plumb, disa gëzhoja u gjetën në vendin e ngjarjes

Një ndejë e organizuar nga 16 zyrtarë policorë në një vilë në fshatin Zllatar të Prishtinës përfundoi me tragjedi.

Kjo pasi që një zyrtar policor u vra me armë zjarri, ndërsa dyshimet se janë se është qëlluar nga kolegu i tij me inicialet F.M.

KALLXO.com mëson detaje të reja në lidhje me natën tragjike.

Siç mëson KALLXO.com ndeja kishte filluar nga ora 19:00. Ata fillimisht deri te vila ishin transportuar me një automjet “Jeep” nga pronari deri te vila për shkak se terreni në atë zonë është vështirë i kalueshëm me automjete të vogla.

Tutje siç mëson KALLXO.com një zyrtar policor një orë më parë ishte larguar nga festa dhe nuk kishte qenë i pranishëm kur kishte ndodhur ngjarja tragjike.

Sipas informacioneve që ka KALLXO.com, zyrtari policor me inicialet F.M., tashmë i arrestuar nën dyshimet për vrasjen, ka shkrepur një plumb i cili ka kapur policin L. Haxholli në pjesën e krahut të majtë e që më pas i ka depërtuar brenda trupit.

Përveç plumbit që kapi viktimën, KALLXO.com mëson se në vendin e ngjarjes janë gjetur edhe disa gëzhoja të tjera.

Gëzhojat janë gjetur në oborrin ku ishte vila në të cilën kishin organizuar ndejën zyrtarët policorë.

Nga e gjithë ngjarja, siç ka raportuar KALLXO.com, 14 armë janë sekuestruar për t’u dërguar më pas në ekzaminim.

Në mesin e armëve të sekuestruara është edhe arma zyrtare e viktimës të cilën e kishte me vete.

Pesë persona janë arrestuar për shkaktim të rrezikut dhe përdorim të armës apo mjetit të rrezikshëm, një për vrasje.

Përveç të arrestuarve janë suspenduar nga puna edhe 9 zyrtarë policorë që ishin prezentë në ndejën e organizuar.

KALLXO.com gjatë ditës raportoi edhe se prokurorja e rastit Besa Limani ka kërkuar masën e paraburgimit për 6 zyrtarë policorë të arrestuar.

Sot është mbajtur seanca për masën e sigurisë për të njëjtit. Ende nuk është marrë vendimi për të njëjtit nga Gjykata e Prishtinës.

KALLXO.com raportoi në lidhje me rastin që ndodhi të premten.

14 armë zyrtare të policëve sekuestrohen pas ngjarjes së rëndë në Zllatar