Përplasje me fjalë mes rektorit dhe dekanit të Fakultetit të Inxhinierisë Mekanike në mbledhjen e Senatit të UP-së

Rektori i Universitetit të Prishtinës, Arben Hajrullahu, ka pasur një përplasje me fjalë me dekanin e Fakultetit të Inxhinierisë Mekanike, Mirlind Bruçi, në mbledhjen e Senatit të UP-së, të mërkurën, më 26.03.2025.

Përplasja mes rektorit Hajrullahu dhe dekanit Bruçi ndodhi në fund të mbledhjes së Senatit, kur Hajrullahu iu drejtua senatorëve duke iu treguar se ka pranuar disa kërkesa përmes email-it si: ndërrimi i bombolave kundër zjarrit, pastrimi i objektit të fakultetit nga mbeturinat – e për të cilat vlerësoi se janë punë që duhet të kryhen prej menaxhmenteve të fakulteteve.

Pas këtij deklarimi të Hajrullahut, Bruçi e mori fjalën dhe tha se e ka njoftuar që nuk kanë ujë në tualetet e Fakultetit Teknik të UP-së dhe tregoi një rast që sipas tij, një studente e ka adresuar.

Për mungesën e ujit që pretendoi Bruçi, Hajrullahu reagoi duke thënë “a me ardhë m’ia mushë kantat (kovat) rektori a çka me bo?”.

“Po të shkruaj për të metat, të cilat janë në Fakultetin e Inxhinierisë Mekanike, që nuk mundem për me marrë m’i ndreqë. Është ardhë studentja, jemi kanë në grup edhe më thot: “Profesor, një vatë (pecetë higjienike) nuk kam ku me ndërru, nuk kam ku m’i la duart”. Kë du me njoftu unë? Ju jeni rektor, unë s’kam para për me marrë me i ndreqë tualetet në fakultet” – ka thënë Bruçi.

Bruçi u ankua për fjalorin që përdori Hajrullahu gjatë diskutimit mes tyre.

Hajrullahu i shpjegoi Bruçit se për kërkesat e tyre si menaxhment i Fakultetit është sekretari i përgjithshëm i UP-së, kompanitë e kontraktuara të cilat kryejnë shërbime edhe në njësitë akademike të UP-së e jo vetëm në Rektorat të Universitetit.

“E dini, kur ka pasë nevojë të dielave, të shtuneve, në vikende, jemi marrë me email-a me çështje, me organet e rendit për këtë punë. Ne jemi në rregull, mirëpo çështjet për çka ju jeni kompetent, e keni stafin atje, o udhëheqësit e degëve, o stafin administrativ mbështetës, o kompanitë të cilat nuk janë kompani vetëm të Rektoratit, po janë kompani të krejt Universitetit të kontraktuara për shërbime të caktuara” – ka thënë Hajrullahu.

Sipas Hajrullahut, Rektorati nuk është përgjegjës për mirëmbajtjen e bombolave kundër zjarrit e fikjen e zjarreve nëpër sallat e mësimit në fakultete.

“Ne do të jemi përgjegjës, në qoftë se ka, kur të vjen te Rektorati, atëherë d.m.th. kanë dështu disa hallka rend, e në qoftë se doni ne e kemi rregulloren për punën e Senatit, ju mund ta keqpërdorni Senatin vetëm për kohën e cila e lejon rregullorja. Ju ftoj, ju apeloj si doni, në mënyrë menaxheriale, në mënyrë profesionale, miqësore, si doni merrne, që kur të ka nevojë, besoni që ne duhet, mund të bëjmë diçka me përmirësu gjendjen në cilëndo katedër jo veç fakultet, ne jemi të gatshëm 24/7, mos hezitoni, kontaktoni do të bëjmë çkado çka është e mundur, mirëpo ne nuk jemi këtu për me ia përfundu punët administratës ose punëtorëve teknikë nëpër njësitë tuaja akademike” – ka theksuar Hajrullahu.

Në këtë mbledhje të Senatit të UP-së u miratua njëzëri Rregullorja e përgjithshme për studimet e doktoratës. Pasi u miratua kjo Rregullore, pritet në fillim të muajit prill të shpallet konkursi për studimet e doktoratës nga UP për vitin akademik 2025/2026. 

Po ashtu u votua edhe Rregullorja për procesin e vlerësimit të brendshëm në procedurën e akreditimit dhe riakreditimit institucional dhe atë të programeve të studimit në UP. 

Senatorët, pa vota kundër dhe pa abstenime, miratuan edhe kërkesën e Fakultetit Juridik të UP-së për angazhimin e ekspertëve të punësuar në institucione publike, të cilët do t’i mbulojnë orët në programet e Klinikave ligjore.