Osmani: Krenare të shoh deputetët e Kosovës në Asamblenë Parlamentare të Këshillit të Evropës
Presidentja e Kosovës, Vjosa Osmani ka komentuar paraqitjen e deputetëve të Kuvendit të Kosovës në Asamblenë Parlamentare e Këshillit të Evropës.
Osmani ka shprehur se ndjehet krenare kur sheh deputetët e Kosovës në asamblenë e KE-së, teksa e ka mbështetur nënkryetaren e Kuvendit, Saranda Bogujevcin për fjalimin e saj.
“Krenare që shoh deputetët e Kosovës në Asamblenë Parlamentare të Këshillit të Evropës. Nga një e mbijetuar e një masakre dhe gjenocidi brutal, në një kampione të pozitës ndërkombëtare të Kosovës si fener i demokracisë, është frymëzuese të shikosh Sara Bogujevcin drejtuar kolegëve deputetë nga e gjithë Evropa” – ka shkruar Osmani në Twitter.
Nënkryetarja e Kuvendit, Saranda Bogujevci, ka shprehur mbështetjen e Kosovës për Ukrainën, e cila po përballet me invazionin rus.
Në fjalimin para anëtarëve Asamblesë së Këshillit të Evropës, ajo ka thënë se Ukraina dhe ukrainasit janë përherë në mendjet dhe zemrat e kosovarëve, ndërkaq Kosova për herë të parë përveç pjesëmarrjes pati edhe të drejtën e fjalës.
Para të pranishmëve, Bogujevci ka deklaruar se i kupton mirë vuajtjet e ukrainasve, pasi edhe vetë është e mbijetuar e një masakre.
Ndryshe, në seancën e Asamblesë Parlamentare të Këshillit të Evropës që po mbahet këtë të martë, Kosova ka të drejtën e fjalës për herën e parë.
Proud to see Kosovo MPs at the Parliamentary Assembly of the @COE.
From a survivor of a brutal massacre & genocide, to a champion of Kosovo’s international standing as a beacon of democracy, it is inspiring to watch @SaraBogujevci address fellow MPs from across Europe. pic.twitter.com/HdW4Z6WXxz
— Vjosa Osmani (@VjosaOsmaniPRKS) October 11, 2022