Foto: BQK
Lajçak: Takimi i sotëm i dialogut ishte hap i rëndësishëm, shumë pyetje politike mbetën pa përgjigje
Emisari i Bashkimit Europian, Mirosllav Lajçak, është deklaruar në lidhje me takimet që ka zhvilluar me përfaqësues nga Kosova dhe Serbia, për të diskutuar për Rregulloren e Bankës Qendrore të Kosovës.
Lajçak thotë se mirëpret angazhimin e palëve për të gjetur një zgjidhje të qëndrueshme. Ai thekson se takimi i dialogut ishte një hap i rëndësishëm, por që sipas tij shumë pyetje politike mbeten pa përgjigje dhe se nevojiten takime shtesë.
“Mirëpres angazhimin e palëve për të gjetur një zgjidhje të qëndrueshme për komunitetet e prekura nga rregullorja e fundit e BQK-së. Takimi i sotëm i Dialogut ishte një hap i parë i rëndësishëm, por shumë pyetje politike mbeten pa përgjigje. Do të nevojiten takime shtesë”- ka shkruar Lajçak në platformën X më 27.02.2024.
I welcome the commitment of the Parties to finding a sustainable solution for the communities affected by the recent CBK regulation. Today’s Dialogue meeting was an important first step, but many political questions remain unanswered. Additional meetings will be needed. pic.twitter.com/yhSXZsw8FP
— Miroslav Lajčák (@MiroslavLajcak) February 27, 2024
Në këtë takim nga pala kosovare prezent kanë qenë guvernatori i BQK-së, Ahmet Ismaili; Dardan Fusha, zëvendësguvernator për Operacione Bankare; Jeton Bajramaj, udhëheqës i Departamentit të Parave dhe Marrëdhënieve Bankare dhe ambasadori i Kosovës në Belgjikë, Agron Bajrami.
BQK përmes një komunikatë për media, thotë se gjatë këtij takimi, delegacioni i lartë i ka informuar dhe paraqitur argumentet lidhur me Rregulloren për Operacione me Para të Gatshme.
Sipas BQK-së, autoriteti kushtetues dhe ligjor i BQK-së dhe rregullimi i vendosur nga BQK-ja nuk u vu në diskutim apo kontestua nga BE-ja.
“Autoriteti kushtetues dhe ligjor i BQK-së dhe rregullimi i vendosur nga BQK-ja nuk u vu në diskutim apo kontestua nga BE-ja, megjithatë janë ngritur disa brenga për ndikimin e mundshëm te qytetarët tanë të komunitetit serb. Ndaj edhe është vlerësuar e nevojshme pjesëmarrja për të dhënë sqarime të duhura lidhur me këto shqetësimet si dhe argumentuar praktikisht mundësitë ligjore dhe teknike ekzistuese të transferimit të mjeteve financiare”- thuhet në komunikatë.
Në komunikatë bëhet e ditur se BQK-ja ka elaboruar në detaje zgjidhjet e mundshme teknike të transferimit të mjeteve përmes kanaleve bankare dhe me transparencë, për të fasilituar në zgjedhjen e opsionit me të lehtë për procesin e transferimit të mjeteve në llogaritë e përfituesve (në Euro), në pajtim me rregullativën ligjore në fuqi.
Gjithashtu, BQK me sugjerim të BE-së, kanë zhvilluar takim edhe me delegacionin teknik të Ministrisë se Financave të Serbisë.
Më 01.02.2024, në Kosovë ka nisur të zbatohet Rregullorja e BQK-së për operacione me para të gatshme. Përveç tjerash, kjo rregullore e përcakton euron si valutë të vetme që përdoret si mjet pagese në Kosovë.
Kjo ka ngjallur reagimin e komunitetit serb që jeton në Kosovë, të cilët bëjnë pagesa e paguajnë me dinarë. Kosova është përballur me kritika dhe paralajmërime serioze për prishje të mundshme të raporteve me SHBA-në. SHBA dhe vendet e tjera të QUINT-it kanë kërkuar shtyrjen e zbatimit të vendimit të BQK-së.
Bashkimi Europian vazhdimisht ka kërkuar që çështja e rregullores së BQK-së të diskutohet në kuadër të dialogut për normalizimin e marrëdhënieve.
Mirëpo, zëvendëskryeministri i Kosovës, Besnik Bislimi ka refuzuar ftesën për të shkuar në Bruksel, pasi nuk ishte që çështja e dinarit serb të ishte pjesë e dialogut.
