Kurti shtron darkë për kryediplomatin britanik, David Cameron

Kryeministri i Kosovës, Albin Kurti, ka mirëpritur sonte në një darkë pune ministrin e Punëve të Jashtme të Mbretërisë së Bashkuar, David Cameron, i cili po e viziton Kosovën për herë të parë.

Në një komunikatë për media thuhet se Kurti në takim u shpreh i lumtur që vitin 2024 po e fillon me një takim të rëndësishëm dypalësh me “miken, partneren dhe aleaten e afërt të Republikës së Kosovës, Mbretërinë e Bashkuar”, teksa e uroi ministrin Cameron për detyrën e tij të re.

Sipas njoftimit, në takim u theksua vlera edhe rëndësia e marrëdhënieve të forta bilaterale ndërmjet dy shteteve, teksa u diskutua për fushat dhe mundësitë e reja të bashkëpunimit dypalësh në shërbim të interesave të përbashkëta dhe të fuqizimit të raporteve të ndërsjella.

“Kryeministri Kurti e njoftoi Sekretarin Cameron me progresin dhe arritjet e Kosovës, veçanërisht në tri vitet e fundit, sa në aspektin ekonomik ashtu edhe demokratik e të sundimit të ligjit. Foli për sukseset dhe sfidat e vitit 2023 dhe përkushtimin e tij dhe Qeverisë së Republikës së Kosovës për zhvillim ekonomik krahas luftimit të krimit dhe korrupsionit, ngritje të mirëqenies së qytetarëve përmes punësimit dhe politikave të duhura sociale, dhe garantim të sigurisë dhe paqes në vend përballë sjelljes agresive dhe kërcënuese të Serbisë”- thuhet në njoftim.

Kreu i ekzekutivit ka falënderuar ministrin Cameron për kontributin e tij edhe sa ishte kryeministër i Mbretërisë së Bashkuar dhe mbështetjen e vazhdueshme që ky shtet i ka dhënë Kosovës në çlirimin, pavarësimin, demokratizimin, zhvillimin e brendshëm dhe integrimin ndërkombëtar, “dhe tash së fundmi në rritjen e sigurisë përgjatë kufirit me Serbinë me zbarkimin e 200 ushtarëve britanikë në tetor të vitit të kaluar në kuadër të misionit të NATO-s në Kosovë”.

Kurse, kryediplomati britanik ka shprehur mirënjohjen e tij për mikpritjen në këtë vizitë, që përveçse është e para e tij në Kosovë, është edhe e para për të jashtë vendit për vitin 2024.

Në njoftim theksohet se Cameron u shpreh krenar për mbështetjen që Mbretëria e Bashkuar i ka dhënë Kosovës dhe për vendimin dhe qëndrimin për ta njohur sovranitetin dhe pavarësinë e saj.

“Unë jam këtu për të përforcuar faktin që ne ju mbështesim juve. Duam që të ju ndihmojmë në rrafshin e sigurisë, atë të zhvillimit ekonomik, të qeverisjes dhe në të gjitha çështjet me të cilat përballeni. Kemi qenë mbështetës afatgjatë të Kosovës dhe do të vazhdojmë të jemi të tillë”-ka deklaruar ai.

Kjo është vizita e parë e një Sekretari të Jashtëm të Mbretërisë së Bashkuar në Kosovë që prej vitit 2016. Në Prishtinë, Sekretari Cameron po shoqërohej nga i dërguari i posaçëm i Mbretërisë së Bashkuar për Ballkanin Perëndimor, Stuart Peach dhe ambasadori britanik në Kosovë, Nicholas Abbott.

Ndërkaq në darkën e punës, e shtruar nga kryeministri Kurti, prezentë ishin edhe zëvendëskryeministrja dhe ministrja e Punëve të Jashtme dhe Diasporës, Donika Gërvalla-Schwarz, ministri i Punëve të Brendshme, Xhelal Sveçla, ministrja e Ekonomisë, Artane Rizvanolli, ministri për Komunitete dhe Kthim, Nenad Rashiq, kryetarja e grupit parlamentar të Lëvizjes Vetëvendosje, Mimoza Kusari Lila dhe ambasadori i Kosovës në Mbretëri të Bashkuar, Ilir Kapiti.

Cameron pritet që nesër të zhvillojë ndaras një takim me ministren e MPJD-së, Donika Gërvalla.

Më pas ai do vazhdojë në Presidencë, ku do të takohet me presidenten Vjosa Osmani.

Kryediplomati britanik David Cameron ka mbërritur në Kosovë, nesër takohet me krerët e shtetit