Vrasja e dyfishtë në Vushtrri, detaje nga Policia, Prokuroria dhe familjari i një prej viktimave
17:36 – Policia: Dorasi 58 vjeçar, viktima 42 vjeçare
Policia e Kosovës ka dhënë detaje në lidhje me vrasjen e dyfishtë në fshatin Stanovc të Vushtrrisë.
Policia thotë se pranoi informatën për vrasje, të hënën, më 24.03.2025, rreth orës 14:56.
Bazuar në hetimet fillestare nga vendi i ngjarjes, Policia thekson se dyshohet se kryesi i veprës, dorasi 58 vjeçar, me iniciale A.M., ka qëlluar për vdekje viktimën femër, 42 vjeçare, me iniciale N.H., e më pas i dyshuari ka qëlluar edhe veten.
Në cilësi të provave materiale në vendin e ngjarjes Policia thekson se ka gjetur dhe konfiskuar një armë pistoletë.
“Me Urdhër të Prokurorit, dy trupat e pajetë dërgohen në Institutin e Mjekësisë Ligjore për obduksion.” – thuhet në komunikatën e Policisë.
PK-ja më tej thotë se hetuesit policorë nën udhëheqjen e Prokurorit po vazhdojnë hetimet për veprat penale: “vrasje e rëndë” dhe “vetëvrasje”.
17:20 – Vrasja në Vushtrri, informacionet e fundit nga vendi i ngjarjes
Njësi të shumta të Policisë së Kosovës dhe Mjekësia Ligjore janë në vendin e ngjarjes ku ka ndodhur vrasja e dyfishtë pasditen e së hënës në Vushtrri, më 24.03.2025.
KALLXO.com mëson se viktima grua është e moshës rreth 40 vjeç.
Deri më tani zyrtarisht nuk është bërë i ditur relacioni i viktimave.
17:09 – Prokuroria: Një burrë dyshohet se fillimisht ka vrarë një grua, e më pas edhe veten
Prokuroria Themelore në Mitrovicë ka njoftuar se një burrë dyshohet se fillimisht ka vrarë një grua, e më pas edhe veten, në ngjarjen e cila ndodhi pasditen e së hënës në Vushtrri, më 24.03.2025.
“Dyshohet se një burrë fillimisht e ka privuar nga jeta një grua dhe pastaj ka bërë vetëvrasje.” – thuhet në njoftimin e Prokurorisë në Mitrovicë për vrasjen e dyfishtë.
Prokuroria ka theksuar më tej se në vendin e ngjarjes ka dalë edhe Prokurori kujdestar.
Sipas Prokurorisë, në vendngjarje janë gjetur disa gëzhoja që dyshohet se janë përdorur në këtë rast.
“Janë duke u intervistuar dëshmitarë dhe në koordinim me Policinë janë duke u hetuar të gjitha rrethanat që kanë çuar në këtë ngjarje të rëndë.” – thuhet në njoftimin e Prokurorisë.
16:27 – Konfirmon Prokuroria: Vrasje e dyfishtë në Vushtrri
Një vrasje e dyfishtë ka ndodhur pasditen e së hënës në Vushtrri, më 24.03.2025.
Zëdhënësi i Prokurorisë në Mitrovicë, Valon Preteni ka konfirmuar për KALLXO.com, se një grua dhe një burrë janë viktima në këtë rast.
Deri më tani ende nuk është zbardhur relacioni i viktimave, por që ngjarja ka ndodhur afër një nënkalimi në Vushtrri.
“Mund t’ju konfirmoj se kemi dy viktima: një grua dhe një burrë. Ende nuk dihen rrethanat që kanë çuar deri te rasti. Prokurori kujdestar është në vendin e ngjarjes.” – tha Preteni për KALLXO.com.
Në anën tjetër, siç merr vesh KALLXO.com, tashmë janë duke u intervistuar edhe persona të cilët janë dëshmitarë në këtë rast.
Deri më tani ende nuk dihen motivet që quan deri te kjo vrasje, ndërsa njësi të shumta policore bashkë edhe me Drejtoreshën e Policisë së rajonit të Mitrovicës, si dhe Prokurorin kujdestar në këtë regjion kanë dalë në vendin e ngjarjes.
Brenda 24 orëve të fundit, dy raste të vrasjes janë regjistruar në Vushtrri.
Mbrëmjen e së dielës, një 19-vjeçar mbeti i vrarë pas të shtënave me armë në qytetin e Vushtrrisë, nga një i dyshuar i moshës së njëjtë.
I dyshuari është arrestuar, ndërsa e ka pranuar fajësinë për vrasjen e bashkëmoshatarit të tij.
Ndaj të dyshuarit, Prokuroria në Mitrovicë bëri Kërkesën e paraburgimit.
15:54 – Të shtëna me armë në Vushtrri, dyshohet për viktima
Të shtëna me armë zjarri janë regjistruar në orët e pasdites në Vushtrri, më 24.03.2025.
KALLXO.com mëson se nga këto të shtëna me armë zjarri ka edhe viktima.
Burime të KALLXO.com tregojnë se tashmë në vendin e ngjarjes janë edhe Policia, Emergjenca dhe Njësitet e tjera policore relevante, që kanë nisur trajtimin e rastit.
