Komuna e Prishtinës hap konkurs për 120 bursa për studentë
Të gjithë studentët e kryeqytetit që studiojnë në universitetet publike të Kosovës, do të kenë mundësi që të fitojnë bursë komunale këtë vit akademik.
Kjo është bërë e ditur në një njoftim për media, ku është thënë se konkursi do të jetë i hapur 15 ditë që nga sot.
“Komuna e Prishtinës ndanë 120 bursa për studentët që studiojnë në universitetet publike të Kosovës, për vitin akademik 2019 /2020. Konkursi mbetet i hapur 15 ditë nga dita e shpalljes në mjetet e informimit publik. Aplikacioni i kërkesës merret dhe i plotësuar dorëzohet në sportelet e katit përdhes të Komunës së Prishtinës (ndërtesa e vjetër), çdo ditë pune prej orës 10:00 deri 15:00”, thuhet në njoftim.
Ndërsa, në konkursin e publikuar është treguar se fitues të bursave do të jenë 120 studentë, por nuk është treguar shuma e bursës.
Në këtë konkurs është theksuar se vetëm studentët e rregullt, së paku 10 vjet banorë të komunës së Prishtinës, pa asnjë dallim etnik, gjinor, race, fetar e politik që janë të regjistruar në fakultete të nivelit bachelor në universitetet publike të Kosovës kanë të drejtë të konkurrojnë.
Po ashtu ky konkurs është i hapur për të gjitha degët e fakulteteve.
Këtu mund t’i shihni kriteret e tjera.
Ndërsa, Ministria e Arsimit, Shkencës dhe Teknologjisë (MAShT), javën e kaluar e ka anuluar konkursin për bursa të saj për këtë vit akademik, për shkak të protestave të studentëve të disa degëve të fakulteteve që nuk ishin përfshirë në këtë konkurs.
Ministria e Arsimit, Shkencës dhe Teknologjisë vendimin për ndarjen e bursave e kishte marrë me 24 tetor dhe si kriter i ka përfshirë vetëm studentët e fushave të studimit të Bujqësisë-Veterinarisë, FShMN-së, Mjekësi e Përgjithshme, farmaci, stomatologji, teknik dhe shkenca të aplikuara.
Në vendim thuhej se kjo është marrë në bazë të Udhëzimit Administrativ për ndarjen e bursave, kryesisht të nenit 3, paragrafi 1.4, ku thotë se ministri e përcakton se cilat fusha duhet të përfshihen.
Që nga shpallja e këtij konkursi, studentët e Fakulteteve të Arteve, Edukimit dhe Shkencave Sportive kishin protestuar e bojkotuar ligjëratat si shenjë proteste për përjashtimin e tyre nga këto bursa.