KDI: Kurti po sfidon parimin e sundimit të ligjit me refuzimin për të dëshmuar në Prokurori
Instituti Demokratik i Kosovës (KDI) ka shprehur shqetësimin e tij lidhur me, siç e ka quajtur, refuzimin e kryeministrit të Kosovës, Albin Kurti, për t’u paraqitur në ambientet e Prokurorisë Speciale në rastin e njohur si “Rezervat shtetërore”.
Sipas KDI-së, ky veprim sfidon dhe minon parimin e sundimit të ligjit dhe barazisë para tij, duke krijuar përshtypjen se zyrtarët e lartë mund të shmangen nga detyrimet ligjore.
“Insistimi i Kryeministrit për të diktuar kushtet e dhënies së dëshmisë – duke këmbëngulur që intervistimi të zhvillohet në zyrën e tij dhe jo në ambientet e Prokurorisë – krijon një precedent të rrezikshëm dhe bie ndesh me dispozitat ligjore në fuqi. Sundimi i ligjit nënkupton se askush, pavarësisht pozitës apo funksionit, nuk gëzon trajtim të veçantë përballë institucioneve të drejtësisë”- thuhet në reagim.
Sipas Institutit, nëse kreu i Qeverisë mund t’u shmanget thirrjeve të Prokurorisë apo të vendosë vetë se ku do të japë dëshmi, atëherë edhe zyrtarëve të tjerë publikë apo qytetarëve të zakonshëm do t’u krijohen mjaftueshëm alibi për ta legjitimuar këtë praktikë.
Tutje KDI-ja ka theksuar se roli i kryeministrit nuk është të vërë në pikëpyetje apo të negociojë zbatimin e procedurave ligjore, por të tregojë se askush – as vetë ai – nuk është mbi ligjin.
Tutje kjo organizatë i ka bërë thirrje kryeministrit Kurti që në respektim të parimit të sundimit ligjit dhe të bashkëpunimit me organet e drejtësisë të paraqitet pa kushte në Prokurorinë Speciale për të dhënë dëshminë e kërkuar.
“Vetëm duke vepruar në këtë mënyrë, ai mund të forcojë besimin e publikut tek institucionet shtetërore dhe të dëshmojë se, në një shtet ligjor të vërtetë, askush nuk është mbi ligjin”- thuhet në njoftim.
Në të njëjtën orë që Gjykata e Prishtinës e ka obliguar të paraqitet në Prokurorinë Speciale të Kosovës në Prishtinë për të dhënë dëshmi lidhur me rastin “Rezervat shtetërore” është paralajmëruar se kryeministri Albin Kurti do të vërë gurin e themelit të një çerdheje në Gjilan.
Bëhet fjalë për orën e datën e njëjtë, më 04.03.2025, në orën 10:00.
Ende nuk dihet se në cilën prej tyre do të paraqitet kryeministri Kurti, ndonëse pjesëmarrja e tij në Gjilan të martën është parlajmëruar zyrtarisht, e për dhënien e dëshmisë, i pari i Qeverisë kishte ftuar prokurorët t’i shkonin në zyrën e tij duke thënë se vetë ai nuk do të paraqitej në objektin e Prokurorisë Speciale.
Ndërkohë, Gjykata Themelore në Prishtinë kishte bërë të ditur për KALLXO.com më 28.02.2025 se ka obliguar Kurtin që të paraqitet në cilësi të dëshmitarit me po këtë datë, lidhur me rastin gjyqësor “Rezervat shtetërore”.
Ndonëse e kishte ftuar kryeministrin tri herë për intervistë në cilësinë e dëshmitarit, Prokuroria nuk kishte arritur ta bindte Kurtin të jepte dëshmi. Prandaj, Prokuroria i ishte drejtuar Gjykatës.
Prokuroria kishte kërkuar nga Gjykata që të nxjerrë vendim për urdhërimin e dëshmitarit Albin Kurti që të paraqitet në objektet e Prokurorisë Speciale për të dhënë dëshmi lidhur me rastin e rezervave shtetërore.
Kallxo.com raportoi më 28.02.2025 se Gjykata e Prishtinës e ka urdhëruar kryeministrin Albin Kurti që të paraqitet në objektin e Prokurorisë për të dëshmuar lidhur me rastin e rezervave shtetërore.
Kurti është urdhëruar që dëshminë ta japë më 04.03.2025 pas vendimit të Gjykatës të datës 21.02.2025, e cila e ka aprovuar kërkesën e Prokurorisë që ta urdhërojë kryeministrin e vendit që të paraqitet në objektin e PSRK-së.
Ky vendim është marrë nga gjyqtari i procedurës paraprake, Valon Kurtaj.
Kryeministri i vendit është ftuar si dëshmitar nga Prokuroria që të japë versionin e tij lidhur me rastin e rezervave shtetërore për të cilin të dyshuar janë afaristi Ridvan Muharremi dhe zyrtarët e Ministrisë se Tregtisë dhe Industrisë, Irfan Lipovica dhe Hafiz Gara.
Për këtë rast e dyshuar nga Prokuroria është edhe e para e kësaj ministrie, Rozeta Hajdari, e cila ishte intervistuar në Prokurori në cilësinë e të dyshuarës.
Deri më tani Prokuroria kishte ftuar tri herë me radhë kryeministrin Albin Kurti, por ai asnjërës ftesë nuk i është përgjigjur pozitivisht.
KALLXO.com kishte raportuar kur i ishte bërë thirrja e tretë Kurtit rreth një javë para Vitit të Ri.
Burimet e KALLXO.com kishin konfirmuar se meqenëse tri herë nuk kanë marrë përgjigje pozitive nga dëshmitari, në këtë rast kryeministri Albin Kurti, prokurorët pritet që të procedojnë tutje – duke bërë kërkesë te gjyqtari i procedurës paraprake që i njëjti të sillet me detyrim për të dhënë dëshminë e tij.
KALLXO.COM kishte raportuar se ishte planifikuar që procedimi për dhënien e dëshmisë së kryeministrit Kurti të bëhet pasi të mbahen zgjedhjet parlamentare më 09.02.2025, me arsyen që të eliminohen pretendimet se veprimet po merren për qëllime politike.
KALLXO.com kishte raportuar më 20.12.2024 se Prokuroria Speciale kishte dërguar një ftesë të dytë në adresë të kryeministrit Albin Kurti për intervistim në cilësinë e dëshmitarit në rastin e rezervave shtetërore, por kryeministri ka ritheksuar gatishmërinë që prokurorët t’i presë në zyrën e tij.
Burime brenda Prokurorisë Speciale kishin thënë për KALLXO.com se nuk e zbatojnë formën e kërkuar nga kryeministri për intervistim, pasi veprimet e tyre ndërmerren në objekt të Prokurorisë.
Sipas burimeve të KALLXO.com, Prokuroria Speciale do përsëriste thirrjen për herë të tretë, të fundit, dhe nëse kryeministri nuk i përgjigjet, do të kërkojë nga Gjykata një urdhër për ta sjellë atë me forcë në Prokurori.
Kryeministri Albin Kurti, në një intervistë në emisionin “Rrjedha” me Rron Gjinovcin dhe Shkëlzen Gashin, të transmetuar në KTV, më 29.12.2024, akuzoi kryeprokurorin e Prokurorisë Speciale, Blerim Isufaj si “regjisor i kësaj situate”.
Kurti deklaroi se nuk do t’i përgjigjet pozitivisht ftesës së Prokurorisë.
“Prokurorët kanë ardhur në Kryeministri edhe më herët. Unë guxoj t’ju them ‘S’po vij’, të shohim tash a guxojnë ata të vijnë” – tha Kurti.
Ai tutje kishte thënë se: “Pikërisht ky prokurori (Blerim) Isufaj, ky është regjisori i një pamjeje kur unë hyj në Prokurorinë e Shtetit dhe prodhohet një lajm ndërkombëtar që Kryeministri hyn në Prokurori të intervistohet për një rast të korrupsionit. Aty nuk thuhet që si dëshmitar. Ky është qëllimi.”
Kryeprokurori i Prokurorisë Speciale, Blerim Isufaj, në konferencën e fundvitit për media, më 30.12.2024, ishte përgjigjur edhe në lidhje me deklarimin e kryeministrit Albin Kurti se ftesa për të dëshmuar i ishte dërguar nga Prokuroria me qëllim që të bëhej lajm ndërkombëtar.
“Unë s’kam asgjë me askënd dhe, me thënë të vërtetën, as nuk e kam shiku çfarë ka thënë” – ishte shprehur Isufaj.
Më 20.12.2024, zëdhënësi i Qeverisë së Kosovës, Përparim Kryeziu, i ka thënë KALLXO.com se ia kanë ritheksuar Prokurorisë Speciale gatishmërinë e kryeministrit që t’i mirëpresë prokurorët në zyrën e tij për intervistim – duke i propozuar tri orare intervistimi, pas pranimit të thirrjes së dytë.
Kryeministri Kurti është thirrur për t’u intervistuar nga Prokuroria si dëshmitar në lëndën “PPS.nr.62/2023”, në një rast që ka të bëjë me veprën penale “keqpërdorimi i pozitës apo autoritetit zyrtar”. Numri i lëndës që gjendet në thirrjen dërguar kryeministrit të publikuar nga Kryeziu – përputhet me atë të rastit të rezervave shtetërore.
Më 11.12.2024 ishte bërë e ditur që kryeministri Kurti ishte ftuar për të dëshmuar, më 16.12.2024, nga Prokuroria Speciale.
Ndonëse ftesa e Prokurorisë Speciale ka qenë që kryeministri Albin Kurti të paraqitet për intervistim si dëshmitar më 16.12.2024, në ora 09:30, një gjë e tillë nuk kishte ndodhur.
Zëdhënësja e Prokurorisë, Liridona Kozmaqi, në një deklarim para mediave kishte thënë se është informuar nga kabineti i Kurtit se kryeministri gjendet në udhëtim jashtë vendit.
“Sot nga kabineti i kryeministrit Kurti, Prokuroria Speciale është informuar se kryeministri Kurti gjendet në udhëtim jashtë vendit dhe e ka të pamundur të paraqitet sot. Prokuroria Speciale, konform legjislacionit në fuqi, do ta përgatisë një ftesë tjetër për kryeministrin Kurti për një datë tjetër” – kishte thënë Kozmaqi.
Rasti i rezervave shtetërore
Të pandehur për rastin e rezervave shtetërore janë: Irfan Lipovica, Hafiz Gara e Ridvan Muharremi.
Lipovica e Gara dyshohen për veprën penale – keqpërdorimi i pozitës apo autoritetit zyrtar, ndërsa Ridvan Muharremi për veprën penale – dhënia e ndihmës në kryerje të veprës penale të keqpërdorimit të detyrës apo autoritetit zyrtar.
Dy zyrtarë të Ministrisë së Industrisë, Ndërmarrësisë dhe Tregtisë, Irfan Lipovica e Hafiz Gara, bashkë me afaristin Ridvan Muharremi, ishin arrestuar më 18.08.2023 nën dyshimin për veprat – keqpërdorim i detyrës zyrtare, dhe – dhënie të ndihmës në kryerjen e veprës penale të keqpërdorimit të detyrës zyrtare.
Ridvan Muharremi, Irfan Lipovica e Hafiz Gara ishin liruar nga masa e paraburgimit me vendimin e Apelit më 31.08.2023, pasi të njëjtit gjendeshin nën këtë masë nga 19.08.2023.
Si e dyshuar lidhur me keqpërdorimet e rezervave shtetërore është intervistuar edhe ministrja aktuale e Ministrisë së Tregtisë dhe Industrisë, Rozeta Hajdari, më 15.04.2024.
