Hovenier reagon pas futjes së Nexhat Krasniqit në listën e të sanksionuarve nga SHBA
Nexhat Krasniqi, shef i prokurimit në Ministrinë e Infrastrukturës, ka hyrë në listën e të sanksionuarve të Departamentit amerikan të Shtetit.
Krasniqit dhe dhe dy fëmijëve të tij u është ndaluar hyrja në territorin amerikan.
Sipas njoftimit, sanksionimi i Krasniqit është “për shkak të përfshirjes së tij në korrupsion të madh”, ndërlidhur me rastin e Parkut Industrial në Drenas.
Lidhur me këtë, ambasadori amerikan në Kosovë, Jeff Hovenier ka reaguar në rrjetin social X, duke thënë se kjo rikonfirmon seriozitetin me të cilin Shtetet e Bashkuara i trajtojnë çështjet e korrupsionit.
“Ne do të vazhdojmë të përdorim të gjitha mjetet në dispozicion për të promovuar llogaridhënien dhe për të penguar sjelljen e ardhshme kriminale duke mbështetur institucionet e Kosovës për sundimin e ligjit” – tha thënë Hovenier.
This announcement reaffirms the seriousness with which the United States takes corruption issues. We will continue to use all available tools to promote accountability and deter future criminal behavior while supporting Kosovo’s rule of law institutions. https://t.co/oI199g1148
— Ambassador Jeff Hovenier (@USAmbKosovo) November 3, 2023
KALLXO.com ka raportuar gjatë ditës për sanksionimin e Nexhat Krasniqit nga Shtetet e Bashkuara.
Krasniqi, si zyrtar përgjegjës i prokurimit në Ministrinë e Infrastrukturës, jo më larg se më 24 tetor 2023 ka nënshkruar kontratën “Pastrimi i veturave” të Ministrisë.
Në njoftimin për kontratë të publikuar nga Ministria e Infrastrukturës, Nexhat Krasniqi figuron si pikë kontakti për këtë tender.
Por kush është Nexhat Krasniqi?
Nexhat Krasniqi, siç ka konfirmuar kryetari i Komisioni Rregullativ i Prokurimit Publik, Osman Vishaj, është aktualisht zyrtar përgjegjës i prokurimit në Ministrinë e udhëhequr nga Liburn Aliu.
Nga viti 2015 ai ka nisur të përballet me ligjin. Asokohe, ishte zyrtar i Ministrisë së Tregtisë dhe Industrisë.
Rasti kishte të bënte me realizimin e Parkut Industrial në Drenas, ku Krasniqi akuzohej se në cilësinë e zyrtarit kishte pranuar ryshfet nga kompania “Eltoni” lidhur me dhënien e lejes së ndërtimit.
Lidhur me këto akuza, Nexhat Krasniqit i ishte shqiptuar dënim prej 26 muaj burgim më 21 shtator të vitit 2015 për keqpërdorim të detyrës zyrtare nga Gjykata Themelore e Prishtinës.
Për të ardhur deri te ky aktgjykim, në Gjykatën Themelore të Prishtinës lidhur me këtë rast ishin mbajtur 22 seanca gjyqësore.
Aktakuza ishte ngritur më 5 nëntor të vitit 2015 për shpërdorim të detyrës zyrtare dhe mashtrim.
Ndaj dënimit të themelores prej 26 muajsh burgim, Nexhat Krasniqi i ishte drejtuar Gjykatës së Apelit, e cila e kishte ndryshuar edhe lartësinë e dënimit edhe cilësimin juridik të veprës penale.
Apeli më 2 maj të vitit 2016 ia zvogëloi dënimi Krasniqit në 18 muaj burgim me kusht për veprën penale – keqërdorim i detyrës zyrtare.
Avokati i Krasniqit, Florent Latifaj, ka thënë për Kallxo.com se për rastin në fjalë ka arritur afati për rehabilitimin gjyqësor dhe është i fshirë nga evidenca.
Trupi gjykues që mori këtë aktgjykim kishte qenë i përbërë nga gjyqtari i EULEX-it Radostin Petrov në cilësinë e kryetarit dhe gjyqtarit raportues, pastaj gjyqtarja e EULEX-it Hajnalka Veronika Karpati dhe gjyqtari kosovar i Gjykatës së Apelit, Driton Muharremi, në cilësinë e anëtarëve të kolegjit.
Edhe me këtë aktgjykim Nexhat Krasniqi nuk kishte qenë i kënaqur duke iu drejtuar Supremes me kërkesë për mbrojtje të ligjshmërisë.
Në shkurt të vitit 2017 Supremja ia refuzoi kërkesën.
Gjykata Supreme kishte konstatuar se aktgjykimet e mëparshme (të Themelores dhe Apelit) nuk kishin qenë me shkelje të dispozitave procedurale siçc kishte pretenduar paraqitësi i kërkesës, Nexhat Krasniqi.
Ky rast ka marrë përgjigje deri në Gjykatën Kushtetuese.
Në shkurt të vitit 2018 kjo Gjykatë vlerësoi se Nexhat Krasniqi kishte bërë kërkesë të papranueshme.