Ferizaj, nis edicioni 53-të i Festivalit të Teatrove
Me shfaqjen “Gënjeshtari” të Teatrin “Adriana Abdullahu” (Teatri “Adriana”) ka nisur mbrëmë (27.08.2023) edicioni i 53-të i Festivalit të Teatrove në Ferizaj (FTF).
Edicioni sivjetëm i këtij festivali do të mbahet deri më 4 shtator 2023 në Ferizaj, me prezantimin e shfaqjeve nga disa teatro shqiptare, nga Kosova, Maqedonia e Veriut e Shqipëria.
Edicionit të 53-të i FTF-së po mbahet pa mbështetjen e Ministrisë së Kulturës, Rinisë dhe Sportit, duke krijuar jo pak telashe për organizatorët e festivalit.
Besim Ugzmajli, drejtor Artistik i festivali ka thënë se sfidat kryesore për organimimin e këtij edicioni te FTF-së kanë qenë të aspektit financiar, pasi që dihet mirëfilli i telasheve të mosfinancimit nga MKRS. Ai ka thënë se FTF u është bashkuar aktiviteteve për shënimin e 150 vjetorit të themelimit të qytetit të Ferizajt.
“Sfidat kryesore kanë qenë të aspektit financiar, pasi që dihet mirëfilli i telasheve të mosfinancimit nga MKRS. Organizimet e tilla duan shumë punë ë angazhim, por edhe nuk mund të bëhen të nivelit të synuar pa një mbështetje të fuqishme financiare e institucionale”- ka thënë ai, në një prononcim për KALLXO.com.
Dhjetë shfaqje teatrore janë paraparë të shfaqen gjatë edicionit të 53-të të FTF-së.
Ugzmajli ka thënë se përveç shfaqjeve gjatë këtij edicion, do të mbahen edhe panele diskutimi e punëtori për teatrin.
“Përveç programit të shfaqjeve që përbëhet nga shfaqjet kryesisht më të suksesshme të vitit, ne kemi pjesë të programit dy panele diskutimi përmbajtjesor për festivalin dhe qytetin e Ferizajt në 150 vjetorin e tij, gjithashtu kemi edhe dy master-class që flasin për dramën dhe regjinë”- ka thënë Ugzmajli.
Sipas tij, pjesë e rëndësishme e programit janë edhe ndejat që janë 9 sosh me artistë të njohur shqiptarë.
Sonet, duke filluar nga ora 19:00 në program është shfaqja e dramës “Gadjo”, bashkëprodhim i Teatrit Kombëtar Eksperimental “Kujtim Spahivogli” në Tiranë dhe Qendrës Multimedia në Prishtinë.
Edicioni i 53-të i FTF-së do të mbyllet me ndarjen e 9 çmime për më të mirët e këtij edicioni.
