Dy kosovarët, të cilët shisnin në "treg të zi" të dhëna personale të vjedhura, ekstradohen në SHBA

Ardit dhe Jetmir Kutleshi janë dy kosovarët të cilët u ekstraduan në Shtetet e Bashkuara të Amerikës pasi ishin kërkuar nga autoritetet amerikane për disa vepra penale: pastrim të instrumenteve monetare, angazhim në transaksione të parave në prona që rrjedhin nga veprimtari të specifikuara të paligjshme, mashtrim dhe veprimtari të ngjashme në lidhje me mjetet e qasjes, mashtrim në lidhje me dokumente të identifikimit dhe informacionit, si dhe për vjedhje të rënduar të identitetit.

Për këto vepra penale, Ardit dhe Jetmir Kutleshi ishin duke u kërkuar nga autoritetet amerikane pasi veprat e tilla janë të sanksionuara me Kodin Penal të Shteteve të Bashkuara të Amerikës.

Duke shfrytëzuar edhe Traktatin Dypalësh mbi ekstradimin mes Qeverisë së Kosovës dhe asaj të Amerikës, Ministrja e Drejtësisë ka marrë Vendim dhe pëlqim që të bëhet edhe ekstradimi i dy të kërkuarve nga SHBA-ja.

KALLXO.com ka siguruar Vendimin e marrë nga Ministria e Drejtësisë në të cilin thuhet se autoritetet amerikane kanë bërë Kërkesë për ekstradimin e dy të kërkuarve, ndërsa Prokuroria Speciale më 05.02.2025 kishte parashtruar Kërkesën në Gjykatën Themelore të Prishtinës për 28-vjeçarin Jetmir Kutleshi dhe 26-vjeçarin Ardit Kutleshin, të dy të lindur në Prishtinë.

Të dy kërkoheshin nga shteti i Pensilvanisë në SHBA.

Ambasada e Amerikës me anë të një postimi në rrjetin X ka thënë se ky ekstradim u bë falë koordinimit të shkëlqyer në bazë të Traktatit Dypalësh të ekstradimit SHBA- Kosovë.

“Ne e vlerësojmë shumë bashkëpunimin e vazhdueshëm të autoriteteve kosovare për të ndihmuar Qeverinë e SHBA-së në këtë rast – gjë që forcon përpjekjet tona të përbashkëta për të mbajtur të sigurt Kosovën dhe Shtetet e Bashkuara.” – thuhet në reagimin e Ambasadës Amerikane.

Për çka dyshohen Ardit dhe Jetmir Kutleshi nga autoritetet amerikane?

Më 12 dhjetor 2024, Departamenti i Drejtësisë në SHBA njoftoi se ishte mbyllur një faqe interneti që funksiononte si “treg i paligjshëm në të cilën shiteshin informacionet personale të vjedhura”, si dhe bëhej shitja e pajisjeve apo aksesit të mjeteve të tjera.

Në atë kohë ishte njoftuar edhe arrestimi i administratorëve të faqes Rydox, Ardit Kutleshit dhe Jetmir Kutleshit.

Departamenti i Drejtësisë kishte njoftuar edhe për arrestimin e një personi të tretë si administrator i Rydox, e që ishte një shtetas kosovar i arrestuar nga autoritetet në Shqipëri me Urdhër të SPAK-ut.

Aktakuza e organeve të Drejtësisë në SHBA flet për faqe për shitje online në treg të zi (Marketplace), i cili dyshohet se ka kryer mbi 7,600 shitje të informacioneve personale, pajisjeve të vjedhura, aksese të vjedhura, e prej të cilave Aktakuza thotë se u gjeneruan të ardhura financiare të paktën 230,000 dollarë nga fillimi i shkurtit të vitit 2016 deri në vitin 2024.

Në njoftimin e Departamentit të Drejtësisë thuhet se faqja Rydox kishte ofruar të paktën 321,372 produkte të kryera në formë kibernetike, kryesisht të dhëna të personave – duke përfshirë këtu vjedhjen e emrave, adresave apo numrave të sigurimeve shoqërore, kredencialeve, llogaritë nëpër internet, informacione të kartelave bankare. Ky treg online (marketplace) dyshohet se pati mbi 18,000 klientë të cilët mund të zgjidhnin më shumë se 300,000 informacione të cilat ishin marrë në mënyrë të paligjshme nga të dyshuarit, e më pas ishin shitur si produkte për klientët.

“Akuza pretendon se për më shumë se 8 vjet, të pandehurit administruan një treg të paligjshëm në internet që shiste PII, informacione të kartës së kreditit dhe kredencialet e hyrjes që ishin vjedhur nga mijëra viktima amerikane.” – kishte thënë zëvendësndihmësi kryesor i Prokurorit të Përgjithshëm Nicole M. Argentieri, kreu i Departamentit Kriminal të Departamentit të Drejtësisë.

Gjithashtu në dhjetor të vitit 2024, Departamenti i Drejtësisë amerikane kishte njoftuar edhe FBI-në dhe Policia Mbretërore e Malajzisë për këtë rast kishin sekuestruar serverë në Kuala Lumpur, Malajzi, që strehonin tregun e paligjshëm Rydox.

Shtetet e Bashkuara morën gjithashtu autorizimin gjyqësor për të sekuestruar kriptomonedhë me vlerë rreth 225,000 dollarë, nga llogaritë e kontrolluara nga të pandehurit.