Abazi vendos nëpër Kuvend fletushka me mbishkrimin 'Kush e lëshoi Radoiçiqin nga rrethimi'
Përderisa kryeministri i Kosovës, Albin Kurti po deklarohej për dialogun Kosovë -Serbi, deputeti Haki Abazi ka vendosur disa fletushka nëpër Kuvendin e Kosovës.
“Kush e lëshoi Radoiçiqin nga rrethimi”- shkruan në fletat që ai i ka vendosur në foltoren e Kuvendit dhe në murin te ulëset e kabinetit qeveritar.
Fletushka me këtë mbishkrim dhe disa tjera me fotografinë e Kurtit, Abazi i ka hedhur edhe në dysheme.
Ky veprim i Abazit ka nxitur reagimin e nënkryetares së Kuvendit nga LVV, Saranda Bogujevci e cila i ka hequr mbishkrimet e vendosura në mur.
Abazi për tri herë radhazi i ka vendosur të njëjta, dhe Bogujevci po ashtu për tri herë është ngritur nga ulësja për t`i hequr të njëjtat.
Ndërsa, mbishkrimin e vendosur në foltore e ka hequr deputetja e LVV-së, Tinka Kurti.
Kuvendi i Kosovës po mban seancë plenare ku në rend të ditës është raportimi i kryeministrit Kurti për procesin e dialogut Kosovë – Serbi pas zhvillimeve të javës së kaluar.
Kërkesat për raportim të Kurtit ka ardhur nga partitë opozitare.
