A duhet të dërgohet projektligji për KPM-në tek Komisioni i Venecias?
Ligji i ri i cili po përgatitet për Komisionin e Pavarur të Mediave (KPM) mund të përfundojë për vlerësim në Komisionin e Venecias.
Por, me këtë propozim nuk është pajtuar kryetari i Komisionit Parlamentar për Media në Kuvendin e Kosovës njëherësh deputeti i LVV-së, Valon Ramadani. Sipas tij, ligji nuk ka ndonjë mangësi për ta adresuar në komision.
“Unë mendoj që s’ka hapësirë me dërgu në Komision të Venecias. Ekspertët e kanë punuar këtë projektligj ju po thuani me dërgu në Komision të Venecias, unë s’po kuptoj me dërgu në Venecia” – tha Ramadani, deputet i LVV-së.
Ai ka premtuar se do të organizohen edhe debate publike me qytetarë.
“Në të ardhmen, pas një jave, pasi të kalon në lexim të parë, unë si kryetar i Komisionit që në shumicën e qendrave të mëdha, se di a mujmë me mbërri në krejt komunat, në shtatë qendrat e mëdha kemi me ftu qytetarët me diskutu për këtë ligj” – ka deklaruar Ramadani në KallxoPernime.
Por, Labinot Leposhtica nga zyra ligjore e BIRN ka thënë se projektligji për KPM duhet të dërgohet në Komisinin e Venecias për t’i shmangur keqinterpretimet.
“Minimumi i korrektësisë për këtë projektligj që është me peshë të madhe, është me dërgu në Komision të Venecias, minimumi i korrektësisë është kjo. I diskutuam arsyet” – ka thënë Leposhtica.
Edhe ish-kryetari i Komisionit Paralemtar për Media në Kuvendin e Kosovës, Nait Hasani, ka thënë se për t’i hequr dyshimet, projektligji për KPM-në duhet të dërgohet në Komisionin e Venecias.
“Valoni duhet me qenë i përgjegjshëm, me thënë po, ne jemi për një ligj transparent, ligj që i shërben qytetarëve, ligj që i shërben mediave dhe ne jemi të gatshëm me çu në Komision të Venecias, nëse ka gabimet, heqja dyshimet, cila është frika e qeverisë që nuk guxon në Venecia?” – ka deklaruar Hasani.
Qeveria e Kosovës ka dorëzuar në Kuvend projektligjin i cili synon që video dhe audio-materialet e publikuara në platformat për shpërndarjen e videove dhe mediat online të kontrollohen nga Komisioni i Pavarur i Mediave (KPM).
Ndryshimi sipas Propozim-Ligjit është bërë në kuadër të Direktivës Evropiane 2010/13/EU për Shërbimet Mediale Audio-Vizuele dhe Direktivën (EU) 2018/1808.
Ky projektligj i dorëzuar më 27 janar të vitit 2023 parasheh që platformat për shpërndarje të video-materialeve dhe mediat online t’i nënshtrohen regjistrimit nga KPM-ja nëse dëshirojnë të publikojnë audio dhe video materiale.
Më shumë në lidhje me këto ndryshime mund të lexoni KËTU.
