Nxënës të shkollës së muzikës "Prenk Jakova" mbajnë koncert në Ditën Botërore të Ndërgjegjësimit për Autizmin

Shkolla e muzikës “Prenk Jakova” në Prishtinë ka mbajtur të mërkurën, më 02.04.2025, një koncert me rastin e Ditës Botërore të Ndërgjegjësimit për Autizmin.

Koncerti “Tingujt e zemrës” u mbajt në amfiteatrin e Bibliotekës Universitare në Prishtinë dhe u përcoll edhe nga kryeministri i vendit, Albin Kurti.

Gjatë këtij koncerti, nxënës të kësaj shkolle interpretuan pjesë nga vepra të ndryshme muzikore të autorëve të ndryshëm.

Jeta Dida-Bujari, drejtoreshë e shkollës “Prenk Jakova”, tha për KALLXO.com se koncerti është organizuar nga drejtoria e shkollës dhe profesorë të nxënësve të kësaj shkolle, disa prej tyre me nevoja të veçanta.

“Çdo vit ne organizojmë një koncert në Ditën Botërore të Autizmit me qëllim të vetëdijesimit të shoqërisë lidhur me personat me nevoja të veçanta dhe përfshirjen e tyre në aktivitete të ndryshme, sikurse ky yni. Ata duhet të ndjehen sikurse ne dhe ne duhet të jemi të vetëdijshëm për këtë”- tha drejtoresha Dida- Bujari.

Për të shënuar Ditën Botërore të Ndërgjegjësimit për Autizmin gjatë ditës së sotme janë organizuar aktivitete të ndryshme.

Në mbarë botën, çdo vit, më 2 prill, me aktivitete të ndryshme shënohet Dita Botërore e Ndërgjegjësimit për Autizmin.