Me koncertin e sopranos Adelina Paloja u hap edicioni i 7-të i "PriVocalFest"

Me koncertin “Eternal Echoes” të sopranos Adelina Paloja ka nisur të hënën, më 14.10.2024, edicioni i 7-të i festivalit “Prishtina International Vocal Festival” (PriVocalFest).

E shoqëruar në piano nga Lirika Pula-Kasapolli dhe kuarteti harkor “Amati”,  sopranoja Paloja interpretoi disa prej veprave të autorëve të huaj dhe shqiptarë, me ç’rast mori duartrokitje të gjata nga publiku.

Nata e parë e “PriVocalFest” ” iu dedikua kauzës për ndërgjegjësimin për kancerin e gjirit.

Sopranoja Paloja tha në fund të koncertit se ndihet e lumtur që iu dha mundësia për të interpretuar në një natë të veçantë dhe para një publiku të veçantë. “Faleminderit festivalit që më dha mundësi që të jem sonte pranë publikut tim të dashur”- tha Paloja.

Ndërsa, Hajrullah Syla, drejtor Artistik i Festivali “PriVocalFest”, deri në fund të këtij edicioni të festivalit do të ketë edhe disa koncerte tjera dhe një punëtori për këndim me maestro Raul Gimenez.

“Të gjitha koncertet e këtij festivali e kanë të veçantën e tyre, por njëra prej pjesëve kryesore të këtij festivali është masterklasi për këndim që po mbahet nga maestro Raul Gimenez, i cili po punon me të rinjtë, dhe koncerti me ta do të jetë më 18 tetor 2024”- ka thënë Syla.

Koncerti i dytë me radhë i këtij festivali do të jetë me 16.10.2024. Opera “King Lear” e kompozitores Zoe Hippius nga ora 19:00 në Amfiteatrin e Bibliotekës Universitare.

Ndërkaq, më 19.10.24, mbahet koncerti “He is someone on earth”, ku Albane Carrere, mexosoprano, paraqitet në skenën e “PriVocalFest” me një program të pasur me vepra të kompozitorëve si L. Berio, H.Tomasi, M. Ravel, B. Britten etj., e shoqëruar nga Andi Duraku, piano dhe Donjeta Cërmjani, violonçelo.

Kurse, në natën përmbyllëse, të pestën, më 20.10.2024, me koncertin “12 months”, “PriVocalFest” sjell korin “ProArs” nga Maqedonia e Veriut me koristë të udhëhequr nga themeluesi dhe dirigjenti i korit Sasho Tatarchevski.

Të gjitha koncertet e edicionit të 7-të të “PriVocalFest” do të mbahen në amfiteatrin e ri të Bibliotekës Universitare, nga ora 19:00 në Prishtinë.