Rrena se personi që vdiq pas rastit në “Bon Vivant” ishte pjesëtar rezervë i FSK-së

I vrari nga sulmi në “Bon Vivant” ishte pjesëtar rezervë i FSK-së

Më datë 5 gusht 2023, portali online “Paparaci” ka publikuar një shkrim me titullin “I vrari nga sulmi në “Bon Vivant” ishte pjesëtar rezervë i FSK-së”. 

Kastriot Ramadani ka vdekur pasi është qëlluar me armë zjarri në ngjarjen e 4 gushtit 2023 në lokalin “Bon Vivant”. 

Njoftimi për vdekjen e tij ishte konfirmuar me datë 05/08/2023  nga Shaqir Uka shef i intenzivës në QKUK.

Gjatë raportimit për këtë ngjarje faqja  “Paparaci” raportoi se Ramadani ishte pjesëtar i Forcës së Sigurisë së Kosovës (FSK). Informacioni i ngjashëm u shpërnda edhe në faqe të ndryshme në Facebook. 

Kërkrimi i Krypometrit me datë 12/08/2023 konstaton se edhe faqja, “Gazeta Blic”,me data 05/08/2023 ka raportuar informacionin  me përmbajtje se: “I vrari te “Bon Vivant” ishte pjesëtar i FSK-së, shoqërohej nga i kërkuari prej FBI-së”

Me datë 05/08/2023 në orën 13 e 31 minuta Forca e Sigurisë së Kosovës përmes një njoftimi zyrtar në rrjetin social ka njoftuar se personi që vdiq me emrin (Kastriot Ramadani) në rastin  “Bon Vivant” nuk është pjesëtar i saj. 

“Informacionet që janë duke qarkulluar në media për rastin e mbrëmbshëm se i vrari është pjesëtar i FSK-së, nuk janë të vërteta”- ka shkruar FSK përmes një njoftimi në Facebook. 

Krypometri ka ndjekur tutje këtë raportim për të kontrolluar nëse personi i vrarë me emrin Kastriot Ramadani ka qenë në të kaluarën pjesëtar i Forcës së Sigurisë së Kosovës.

Pas këtij publikimi Krypometri ka kërkuar nga FSK përgjigje nëse Ramadani ishte ndonjëherë pjesë e FSK-së përfshirë edhe komponentën rezervë. 

“Sipas kërkesës tuaj, ju njoftojmë se në bazë të të dhënave që kemi Kastriot Ramadani nuk është as nuk ka qenë pjesëtar i FSK, as në komponentin aktiv, as në komponentin Rezervë”- ka thënë për Krypometrin, Vëllazërim Qerimi, shef i zyrës për informim në FSK në një përgjigje të datës 12/08/2023.