Mario Labudoviq nuk ka thënë se një ilaç për tri ditë shëron nyjet 

Mario Labudoviq: Riktheni shëndetin e nyjeve, efekti i pilulave në ditën e 3-të

Më 13.06.2024, faqja në Facebook ‘𝚖𝚎𝚍𝚒𝚌𝚊𝚕 𝚜𝚝𝚘𝚛𝚎’ (arkiva) ka publikuar një artikull me titull “Mario Labudovic: Riktheni shëndetin e nyjeve, efekti i pilulave në ditën e 3-të”.

Në këtë artikull citohet ‘Mario Labudoviq’, për të cilin pretendohet se e rekomandon një produkt me pretendimin se i njëjti shëron nyjet.

Kur klikon mbi këtë artikull të dërgon tek ueb faqja ‘xk.naddyn.com’ (arkiva) në të cilën vetëm kërkohen për ta porositur këtë produkt online.

Krypometër, përmes kërkimit të fotografive në Google Lens ka gjetur se personi në fotografi është Mario Labudoviq.

Nga kërkimet në internet rezulton se Mario Labudovic është sipërmarrës dhe autor i disa librave, influencer në media sociale dhe pronar i MarioLAB Center në Zagreb të Kroacisë.

Krypometri ka pyetur Labudoviq nëse ka thënë ndonjëherë që brenda 3 ditëve shërohen nyjet dhe i njëjti ka mohuar ta ketë thënë ndonjëherë këtë gjë.

“Kjo është dezinformatë, nuk kam thënë ndonjëherë ndonjë gjë të tillë”- tha për Krypometër, Labudoviq.

Artikulli promovon suplementin e quajtur ‘Flexiwell’ që pretendohet se rikthen shëndetin e nyjeve.

Në listën e produkteve që kanë autorizim marketingu që është e publikuar në faqen e Agjencisë Kosovare për Produkte dhe Pajisje Medicinale, nuk figuron një ilaç me emrin ‘Flexiwell’.

Agjencia e Kosovës për Produkte dhe Pajisje Medicinale është institucion i cili rregullon shitjen dhe importin e ilaçeve në Kosovë.

Neni 16 i Ligjit për Produkte dhe Pajisje Medicinale thotë se “produkti medicinal mund të plasohet në Republikën e Kosovës vetëm pas marrjes së Autorizimit për Marketing nga AKPPM”.

Reumatologu, Besim Demolli, ka thënë për Krypometër se Osteoartriti, osteoporoza dhe frakturat osteoporotike janë sëmundje kronike të pashërueshme.

“Trajtimi për këto sëmundje fokusohet në menaxhimin e simptomave dhe përmirësimin e cilësisë së jetës. Kjo përfshin terapinë fizike për përmirësimin e forcës dhe fleksibilitetit, modifikimet në stilin e jetës, për menaxhimin e peshës dhe reduktimin e barrës në nyje, medikamentet për lehtësimin e dhimbjes dhe inflamacionit, si dhe ndërhyrjet kirurgjikale në raste të rënda”– tha Demolli për Krypometër. 

Demolli, ka thënë se këto sëmundje nuk mund të shërohen me suplemente. Ai ka thënë se personat që kanë sëmundje të tilla duhet të konsultohen me profesionistë.

Është e rëndësishme të shmangen suplementet e paprovuara dhe të panevojshme që nuk rekomandohen nga organizata të respektuara si ACR dhe EULAR, pasi ato mund të jenë jo vetëm të panevojshme, por edhe potencialisht të dëmshme”– tha Demolli për Krypometër.