Krahasimi i pabazuar i migrimit në kohën e Millosheviqit dhe me periudhën e pasluftës

Organet e drejtësisë në Kosovë janë mbrojtës kryesorë të të krimit dhe korrupsionit. Ata që ja bënë jetën e qytetarëve skëterrë, që i detyruan me marrë rrugën e mërgimit më keq se në kohën e Millosheviqit

Më 01.05.2024 një profil në Facebook (arkiva) është postuar një video (arkiva), në të cilën një person bën thirrje për mobilizim për zgjedhjet e ardhshme në mënyrë që Vetëvendosja t’i fitojë 80 vende në Kuvendin e Kosovës, pra shumicën e kualifikuar.

E njëjta video është shpërndarë në disa grupe në Facebook, si: “Top Channel ✅” (arkiva), “LAJMI FUNDIT LIVE 🇺🇸” (arkiva),  “Gjithmon Shqipetare 🇦🇱🇦🇱🇦🇱” (Arkiva).

Në këtë video, ndër të tjera, ky person thotë se organet e drejtësisë në Kosovë i kanë detyruar qytetarët që të marrin rrugën e mërgimit. 

“Organet e drejtësisë në Kosovë janë mbrojtës kryesorë të krimit dhe korrupsionit, janë ata që ja bënë jetën e qytetarëve skëterrë, që i detyruan me marrë rrugën e mërgimit më keq se në kohën e Millosheviqit, tash janë të angazhuar me çdo kusht që Qeveria Kurti të dështojë në këtë drejtim” – thotë ndër të tjera ky person (shiko videon (arkiva) nga min 0:40).

Për të verifikuar këtë konstatim, Krypometër ka shfletuar dokumentet zyrtare të Gjykatës Ndërkombëtare të Hagës dhe dokumentet e prodhuara nga institucionet e Kosovës për numrin e personave që janë larguar nga Kosova në kohën e Milosheviqit.

Sa persona janë larguar nga Kosova gjatë kohës së Millosheviqit?

Në aktakuzën e Tribunali Ndërkombëtar i Hagës ndaj Millosheviq dhe të tjerëve, janë paraqitur të dhëna për numrin e shqiptarëve të dëbuar nga Kosova që nga fillimi i luftës në Kosovë e deri në maj 1999 nga Kosova. Në aktakuzë thuhet se gjatë luftës ishin dëbuar më shumë se 740 mijë shqiptarë të Kosovës, afërsisht sa një e treta e gjithë popullsisë shqiptare.

“Planifikimi, përgatitja dhe ekzekutimi i fushatës së ndërmarrë nga forcat e Jugosllavisë dhe të Serbisë në Kosovë ishte planifikuar, nxitur, urdhëruar, kryer ose ndryshe i ndihmuar dhe nxitur nga Sllobodan Millosheviqi dhe të tjerët”– thuhet ndër të tjera në aktakuzën e ngritur me 27 maj 1999.

I cilësuar si “Kasapi i Ballkanit”, në aktakuzën e Tribunalit të Hagës, Millosheviq ishte akuzuar për fushatë sistematike të shkatërrimit të pronave të shqiptarëve në qytete dhe fshatra.

Raporti “Raporti i Zhvillimit Njerëzor në Kosovë 2014” thotë se pjesa më e madhe e qytetarëve të përndjekur nga Kosova deri në vitin 1999 janë kthyer në Kosovë pas përfundimit të luftës.

Në raportin e Fondit për të Drejtën Humanitare për çështjen e të zhdukurve në luftën e fundit në Kosovë, thuhet se janë përafërsisht rreth 1 milion njerëz të zhvendosur nga Kosova, si pasojë e luftës në Kosovë (1998-2000).

Po ashtu, në këtë raport thuhet se në periudhën nga 1 janari 1998 e deri më 31 dhjetor të vitit 2000 janë gjithsej 13 mijë e 535 persona të vrarë ose të zhdukur. Prej tyre, 10,812 shqiptarë, 2,197 serbë dhe 526 viktima të komuniteteve romë, boshnjakë, malazezë dhe joshqiptarë të tjerë. Prej tyre, edhe sot e kësaj dite 1,620 persona vazhdojnë të jenë të zhdukur dhe ende nuk dihet asgjë për ta.

Shefik Sadiku, sekretar i Komisionit Qeveritar për njohjen e statusit të ish të dënuarve dhe përndjekurve politikë ka thënë për Krypometrin se që nga 2013-ta për njohjen e këtij statusi janë bërë rreth 12 mijë aplikime, ndërsa prej tyre rreth 6 mijë janë proceduar për tu shqyrtuar. 

Sipas Sadikut, edhe sot e kësaj dite vazhdojnë aplikimet, ndërsa mandati i këtij Komisioni është deri në mars 2026, me mundësi vazhdimi me miratimin e Qeverisë së Kosovës. Aplikimet, sipas Sadikut, përfshihen nga viti 1945 deri në vitin 1999.

Emigrimi nëpër vite 

Sipas një vlerësimi të bërë në vitin 2011 nga Agjencia e Statistikave të Kosovës (ASK), vlerësohet se numri i qytetarëve të Kosovës që jetojnë jashtë vendit, që kanë emigruar apo me prejardhje nga Kosova, ka qenë diku rreth 700 mijë.

Në raportin e ministrisë së Punëve të Brendshme “Profili i zgjeruar i migrimit 2013 – 2017” thuhet se numri i popullsisë Kosovare të emigruar dhe asaj me prejardhje Kosovare (1969-2011) është vlerësuar të jetë 703,978 banorë, derisa në vitin 2017 vlerësohet të jetë 833,739 banorë. 

Pra, në bazë të kësaj statistike, në periudhën 2011-2017 kanë emigruar nga Kosova 130 mijë persona. Kurse, raporti tjetër i Ministrisë së Punëve të Brendshme “Profili i zgjeruar i migrimit 2018 – 2022” thotë se për periudhën “2018-2022 vlerësohet se nga Kosova janë larguar 156,080 banorë apo rreth 8.85% e popullsisë së vendit”. 

Pra, krahasimi i emigrimit që ka ndodhur pas vitit 2000 me përndjekjet e bëra në kohën e Millosheviqit nuk është i saktë.