Intervistë: Visar Ymeri flet për PSD-në, VV-në dhe dialogun

Nënkryetari i Partisë Socialdemokrate (PSD) si dhe deputeti i Kuvendit të Kosovës, Visar Ymeri duke folur për të përbashkëtat dhe dallimet me ish-partinë e tij Lëvizjen Vetëvendosje ka thënë se njerëzit e larguar nga kjo parti kanë qenë motori i përmirësimit të saj.

Në një intervistë për KALLXO.com Ymeri përveç raporteve më VV-në ka folur edhe për kryetarin e tanishëm të Lëvizjes Vetëvendosje, Albin Kurtin.

Poashtu në këtë intervistë deputeti Ymeri ka folur për ekipin negociator, platformën në dialogun Kosovë-Serbi, qeverinë gjithëpërfshirëse të propozuar nga LDK si dhe rolin e Partisë Socialdemokrate në të gjitha këto zhvillime.

KALLXO.com: Z. Ymeri, para pak ditëve, delegacioni shtetëror miratoi platformën për dialogun Kosovë-Serbi, platformë e cila në një ndër pikat e saj thotë që objektivi i marrëveshjes janë zgjidhja e çështjeve të hapura. Çka konsideroni ju çështje të hapur kur dihet që për palën serbe çështje e hapur është edhe territori i vendit?

Visar Ymeri: Në platformë përveç parimeve kryesore janë të ravijëzuara ato të cilat Kosova i konsideron si çështje të hapura me Serbinë dhe që i mbulojnë çështjet që kanë të bëjnë me të kaluarën pra prej krimeve të luftës e deri te çështja e të pagjeturve, viktimat e dhunës seksuale, dëmet e luftës që janë shkaktuar në ekonominë qoftë private ose shoqërore në Republikën e Kosovës dhe në anën tjetër edhe çështje që kanë të bëjnë me suksesionin karshi pasurisë së federatës jugosllave në të cilën Kosova ka qenë pjesë barabartë dhe në anën tjetër edhe karshi dokumenteve, traktateve ndërkombëtare që kanë qenë të nënshkruara nga Jugosllavia në të cilat Kosova do të duhej t’ia trashëgonte pjesën e vet. Pra këto janë ato që Republika e Kosovës, përmes platformës së delegacionit shtetëror i konsideron si çështje të hapura me Serbinë. Ndërkohë që për ato se çka konsideron Serbia si çështje të hapura ende nuk kemi kurrfarë informate nga Brukseli nëse ata kanë dorëzuar ndonjë dokument ose jo. Natyrisht që kur dorëzohen çështje të tilla natyrisht që delegacioni shtetëror do të vendosë nëse tema të caktuara janë të pranueshme ose jo në bazë të platformës e cila presim ta miratojnë në kuvendin e Republikës, javën e ardhshme.

KALLXO.com: Në pikën 3 të Platformës, thuhet që dialogu pritet të intensifikohet në mënyrë që të arrihet një marrëveshjes ‘ligjërisht obliguese’ gjatë këtij viti. A besoni se në këtë momentum politik kur raportet me Serbinë janë në nivelin më të ulët dhe në Kosovë nuk ka unitet të brendshëm, është realiste të pritet një marrëveshje gjatë këtij viti?

Visar Ymeri: Kemi ardhur në një moment në të cilin është jashtëzakonisht e rëndësishme që Republika e Kosovës njëherë e përgjithmonë ta përfundojë këtë çështje. Prej se e kemi shpallur pavarësinë i kemi pasur vetëm dy vite pa dialog me Serbinë, pra nga viti 2008-2010 dhe prej vitit 2010 pas rezolutës së Asamblesë së Përgjithshme (të OKB-së), Kosova ka qenë në një mënyrë ose tjetrën e përfshirë së dialogun me Serbinë dhe fatkeqësisht kjo ka qenë një prej temave që i ka gllabëruar të gjitha energjitë institucionale dhe kështu shumë prej çështjeve të rëndësishme kanë mbetur larg edhe diskutimit publik e qe besa edhe vendimmarrjes institucionale. Në këtë drejtim konsiderojmë që është e domosdoshme që sa më shpejt Republika e Kosovës njëherë e përgjithmonë ta përfundojë këtë çështje me Serbinë, mirëpo kjo nuk nënkupton që çdo përfundim është përfundim. Pra për delegacionin shtetëror dhe për platformën ka vetëm një mënyrë të përfundimit të kësaj çështjeje e ajo është njohja e Republikës së Kosovës nga Serbia.

KALLXO.com: Çka nëse Kosova dhe Serbia nuk arrijnë marrëveshje ligjërisht obliguese. Cilat janë pasojat për Kosovën, sipas PSD-së?

Visar Ymeri: Do të mbetemi në të njëjtën pozitë siç jemi tash. Mendoj që ky pozicion, pra i kontestimit të vazhdueshëm të shtetësisë nga Republika e Serbisë që pastaj po reflektohet edhe nëpër vende të tjera nuk është se nuk i shkakton probleme Republikës së Kosovës dhe në këtë drejtim natyrisht që do të kishte me qenë një avancim jashtëzakonisht i madh i konsolidimit ndërkombëtar do të thosha të sovranitetit të Kosovës nëse një marrëveshje e tillë do të mund të arrihet, mirëpo nëse flasim për rrethanat politike në të cilat ndodhemi në rajon e pastaj në Bashkimin Evropian, globalisht, atëherë mendoj që edhe këtu duhet të jemi shumë syçelë edhe ta bëjmë një analizë të mirëfilltë të asaj se deri në ç’masë janë rrethanat aktuale të përshtatshme dhe deri në çmasë do të jenë ato më të mira në të nesërmen.

Në këtë drejtim Republika e Kosovës për mendimin tim edhe të delegacionit shtetëror është e domosdoshme që t’i marrë të gjitha masat në mënyrë që të jetë sa më mirë e përgatitur përsa i përket dialogut me Serbinë në mënyrë që ta nxjerrim maksimumin nga ky dialog.

Edhe në Serbi duhet të themelohet një Gjykatë Speciale për krimet e luftës

KALLXO.com: Poashtu në këtë platformë në një nga pikat e saj përmend edhe krijimin e mekanizmave të përshtatshëm për të adresuar krimet e luftës, për çfarë mekanizma e keni pasur fjalën?

Visar Ymeri: Këtu është ideja që Republika e Kosovës, delegacioni shtetëror dhe në përgjithësi populli i Kosovës nuk janë aspak të kënaqur me atë se çfarë ka bërë deri tash Serbia në dënimin e atyre që kanë qenë të përfshirë në krimet e luftës ndaj popullatës civile në Republikën e Kosovës. Pra ka shumë pak dënime e ka shumë krime që i ka kryer Serbia këtu. Dhe këtu është menduar që për një mekanizëm që do t’i përngjasonte këtij që e kemi në Republikën e Kosovës, pra në formën e Gjykatës Speciale të themelohet edhe në Serbi që të merret ekskluzivisht me ato krime që janë kryer nga forcat ushtarake, policore, paramilitare të Serbisë ndaj popullatës civile në Kosovë.

KALLXO.com: Ne e dimë se presidenti i vendit Hashim Thaçi vetëm se e ka themeluar në vitin 2017 Komisionin për Pajtimin dhe të Vërtetën. A ka ndonjë ndërlidhje apo koordinim mes këtij Komisioni dhe ‘Mekanizmave’ që ju po përmendi?

Mendoj që janë absolutisht të ndryshme. Atë që ne e kemi kërkuar përmes platformës është që të themelohet një formë e Gjykatës Speciale e cila merret me gjykimin dhe dënimin e akterëve që kanë kryer krime. Pra kjo nuk bie është përbrenda logjikës së asaj që quhet drejtësi kalimtare ose tranzicionale, pra nuk është ideja që përmes diskutimit t’i ballafaqojmë xhelatët dhe viktimat në mënyrë që të arrijmë njëfarë pajtueshmërie duke e dëgjuar rrëfimin e njëri-tjetrit, këtu kemi të bëjmë me krime të cilat e kanë përmasën e krimeve jo vetëm të luftës por edhe krimeve kundër njerëzimit dhe tentim gjenocidit dhe kjo duhet të ndëshkohet

KALLXO.com: Në Parimin 4 të platformës qeveritare, nënvizohet se ka për të pasur reciprocitet të plotë të të drejtave të shqiptarëve që jetojnë në Serbi dhe komunitetit serb në Kosovë. A do të ketë edhe ndryshime kushtetuese, meqë komuniteti serb në Kosovë ka fuqi të ndalojë amandamentimin e Kushtetutës ndërsa shqiptarët në Luginën e Preshevës kanë probleme me të drejtat elementare të njeriut. A mund të na e pikturoni reciprocitetin e plotë?

Visar Ymeri: Ideja në këtë pikë është që marrëveshjen përfundimtare ta përfshijmë një standard të të drejtave të njeriut dhe të drejtave të pakicave që është i aplikueshëm në të dyja anët. Kjo është pjesë përbërëse e marrëveshjes. Natyrisht që ne në marrëveshjen përfundimtare edhe gjatë negociatave me Serbinë do të insistojmë që pozicioni politik i shqiptarëve në Luginë të Preshevës ta arrijë nivelin e merituar jo vetëm në raport me të drejtat e njeriut por edhe në raport edhe me të drejtat që shqiptarët duhet t’i gëzojnë dhe ky modalitet i zgjidhjes së kësaj çështjeje duhet ti përngjasojë asaj që Kosova ka ofruar për pakicat kombëtare që jetojnë në Kosovë. Nuk ka kurrfarë kuptimi që të kemi standarde të ndryshme përsa i përket trajtimit të pakicave në rajon e që janë të ndryshme nga Bashkimi Evropian, duke qenë vendet aspirante për anëtarësim në BE si Kosova ashtu edhe Serbia natyrisht që duhet ta kenë një standard të përafërt ose të njëjtë me BE-në.

KALLXO.com: Derisa platforma e Qeverisë po synon avansimin e të drejtave të shqiptarëve në Serbi, presidenti Thaçi po përmend mundësinë që marrëveshja finale të përfshijë edhe bashkimin e Luginës së Preshevës me Kosovën. Cili do të rezultati kur dihet se presidenti është duke e proklamuar idenë e tij për ‘korrigjim të kufirit’?

Visar Ymeri: Këtu e kemi një situatë jashtëzakonisht të ndjeshme e edhe serioze dhe të rëndësishme në artikulimin e një qëndrimi që Republika e Kosovës e ka karshi dialogut dhe ajo çfarë kemi bërë ne si delegacion shtetëror kemi synuar që përmes kësaj platforme edhe ta ravijëzojmë qëndrimin tonë, parimet tona dhe kërkesat tona karshi Serbisë në dialog. Por në anën tjetër edhe ta shndërrojmë këtë në një dokument shtetëror i cili pastaj është obligativ për të gjitha palët kështu që në këtë drejtim në momentin kur të votohet dhe të miratohet kjo platformë në Kuvendin e Kosovës atëherë ky do të jetë qëndrimi zyrtar i Kosovës. Çkado tjetër mund të jetë ide individuale e personave të ndryshëm mirëpo ky do të jetë qëndrimi zyrtar dhe kushdo që flet për dialogun ose kushdo që pretendon në emër të Republikës së Kosovës përsa i përket marrëdhënieve me Serbinë duhet t’i referohet këtij dokumenti. Pra ky dokument nuk është platformë e qeverisë, ky dokument do të bëhet platformë e Kuvendit dhe propozohet nga delegacioni shtetëror i cili është konsultuar edhe me institucione tjera zyrën e Presidentit dhe me kryeministrin dhe është dakorduar edhe nga ata.

Delegacioni shtetëror është organi ekskluzivisht vendimmarrës përsa i përket dialogut

KALLXO.com: Cili do të jetë roli i presidentit Thaçi ne ekipin e ri negociator dhe roli i ekipit negociator tek ajo që po e negocion Presidenti Thaçi?

Visar Ymeri: Me ligjin për delegacionin shtetëror i cili ka kaluar në lexim të parë dhe do të votohet në lexim të dytë së bashku me platformën në të njëjtën seancë, aty është e ravijëzuar shumë qartë se cilat janë përgjegjësitë dhe kompetencat e delegacionit shtetëror dhe raportet e delegacionit shtetëror duhet ta ketë me institucionet kushtetuese, pra me Presidentin, Kryeministrin dhe të tjerë dhe në këtë drejtim ka dy nivele të marrëdhënieve: e para, duke qenë që është entiteti i vetëm për negocimin e marrëveshjes me Serbinë, delegacioni shtetëror koordinohet së bashku me organet e tjera kushtetuese në rastet e ftesave për takimet që zhvillohen në mes të Presidentit të Kosovës me Presidentin e Serbisë ose të Kryeministrit të Kosovës me Kryeministrin e Serbisë, pra këtu është obligimi për koordinim në të cilin asnjë takim nuk mund të ndodhë pa përfaqësimin e delegacionit shtetëror pavarësisht se cili prej institucioneve kushtetuese thirret në takim nga ndërmjetësuesit.

Në anën tjetër, kemi edhe komponentën e konsultimit e që ka të bëjë me vendimmarrje brenda delegacionit shtetëror. Pra delegacioni shtetëror është organi ekskluzivisht vendimmarrës përsa i përket dialogut, mirëpo në këtë vendimmarrje me ligj obligohet që të konsultohet edhe me organet tjera.

KALLXO.com: E përmendët që ka pasur konsultim me Presidentin, Kryeministrin dhe me ekipin negociator. Z. Ymeri, dy partitë më të mëdha opozitare, LDK-së dhe VV-së, nuk kanë marrë pjesë as në ekipin negociator e as në hartimin e platformës. Sa është efektiv ky delegacion dhe kjo platformë pa pjesën tjetër të opozitës?

Visar Ymeri: Delegacioni është votuar nga deputetët e Kuvendit të Kosovës dhe e ka legjitimitetin demokratik. Natyrisht që do të kishte me qenë shumë mirë dhe vazhdon të mbetet jashtëzakonisht e rëndësishme që në delegacion të jenë të përfshira të gjitha palët mirëpo kjo varet edhe prej vullnetit të LDK-së dhe VV-së nëse duan të marrin pjesë ose jo në punën e delegacionit shtetëror. Mendoj që duke qenë pjesë e Kuvendit, ato janë të përfshira në procesin e dialogut, do të jenë të përfshira në mbikëqyrjen e tij, mirëpo kjo nuk e vë në pikëpyetje peshën politike që e ka delegacioni shtetëror e as efikasitetin institucional që do ta ketë ai.

KALLXO.com: Ju më parë sa ishit pjesë e VV-së keni folur në vazhdimësi për mungesën e unitetit të brendshëm në dialogun me Serbinë. Pse konsideroni se skena politike është më e unifikuar në bisedimet me Serbinë?

Visar Ymeri: Për herë të parë në Republikën e Kosovës prej që është shpallur pavarësia, kemi një mekanizëm, një platformë, një delegacioni shtetëror i cili ka krijuar hapësirë të jashtëzakonshme vendimmarrëse për subjektet politike të cilat nuk janë të përfshira në ekzekutiv. Pra janë tri subjekte opozitare në Kuvendin e Republikës së Kosovës dhe të tria këto e kanë hapësirën e brenda delegacionit shtetëror në mënyrë që të përfshihen në këtë proces i cili i tejkalon jo vetëm përmasat e partive politike individualisht por edhe përmasat e një qeverie duke e pasur parasysh rëndësinë që e ka ai dhe veçanërisht duke i pasur parasysh përvojën e hidhur që e kemi në të kaluarën me këto procese të negociatave të cilat kanë qenë jotransparente dhe që kanë prodhuar të këqija e dëme për Republikën e Kosovës se sa që kanë sjellë ndonjë të mirë dhe në këtë drejtim ne si PSD duke qenë sponsorues të këtij lloj aranzhimi për dialogun me Serbinë e kemi parë të domosdoshme që të krijohet një mundësi ku të gjitha forcat politike të përfaqësuara në Kuvend të kenë mundësi që të përfshihen në procesin e dialogut nga pozicioni vendimmarrës.

Refuzimi për të marrë pjesë në delegacionin shtetëror është qëndrim politik i partive opozitare, nuk po hyj ta gjykoj fare nëse kanë të drejtë ose jo, mirëpo nuk besoj që ka hapësirë të thuhet që sot në Republikën e Kosovës nuk ka mundësi të tentimit të konsensusit politik përsa i përket dialogut me Serbinë.

Njohja reciproke do t’i definojë marrëveshjet e arritura deri më tani

KALLXO.com: Në kuadër të dialogut të deritanishëm janë arritur një numër i madh i marrëveshjeve me Serbinë. Në platformë zbatimi i tyre është konsideruar si i ’pjesshëm dhe asimetrik’. Më herët ju poashtu keni kërkuar që t’i rishqyrtoni të gjitha marrëveshjet, mirëpo në platformë nuk përmendet. Cili është pozicioni i tanishëm i delegacionit shtetëror edhe i juaji si PSD a duhet të rishikohen marrëveshjet?

Visar Ymeri: Është e qartë që në marrëveshjet një pjesë të madhe nuk janë zbatuar nga Serbia pra nëse e sheh zbatueshmerinë nga ana e Kosovës, zbatueshmëria është jashtëzakonisht e lartë, mirëpo nga Serbia nuk janë zbatuar. Një pjesë e konsiderueshme e këtyre marrëveshjeve janë të padrejta dhe rishikimi e vlerësimi i këtyre marrëveshjeve do të na sillte një përgjigje të cilën tashmë e dimë, që Serbia nuk i ka zbatuar, ne i kemi zbatuar, dhe që marrëveshjet një pjesë e tyre, ne si opozitë kemi kërkuar fare që të mos zbatohen sepse kanë qenë ose kanë pasur elemente jashtëzakonisht problematike ose që kanë qenë të dëmshme për Republikën e Kosovës. Poashtu duke pasur parasysh që një pjesë e këtyre marrëveshjeve i takojnë një lloj aranzhimi teknik të marrëdhënieve mes dy vendeve dhe në momentin që ta arrijmë një marrëveshje e cila është marrëveshje për njohje, atëherë në shumë prej fushave në të cilat kemi marrëveshje të pjesshme rregullohen me ligjin ndërkombëtar.

Në këtë drejtim mendoj që kjo është ajo qasja kritike që delegacioni shtetëror e ka karshi marrëveshjeve. Për mendimin tim, aktualisht ato marrëveshje janë të parëndësishme sepse e kemi një proces të dialogut i cili synon njohjen. Nëse arrihet njohja, kjo i definon pastaj ato marrëveshje. Nëse nuk arrihet njohja mund të kthehemi prapë në atë pikën ku prapë duhet të flasim për zbatueshmerinë dhe zbatimin e këtyre marrëveshjeve.

KALLXO.com: Një platformë sesi duhet të vazhdojë dialogu me Serbinë e ka publikuar edhe LDK. Si e keni parë këtë platformë, cilat janë të përbashkëtat dhe dallimet?

Visar Ymeri: Nuk është se kam mbërri ende ta lexoj kështu në detaje platformën e LDK-së. Mendoj që ka shumë çështje që janë të përafërta me atë që i kemi ravijëzuar ne këtu në platformë me aq sa kam dëgjuar në deklarimet e ndryshme publike të përfaqësuesve të LDK-së dhe VV-së, kjo platformë praktikisht i adreson të gjitha çështjet që ata i kanë ngritur si problematike karshi procesit të dialogut me Serbinë dhe në këtë drejtim konsideroj dhe do të kisha pritur që edhe deputetët e LDK-së dhe të VV-së ta votojnë këtë platformë dhe natyrisht të propozojnë ndonjë çështje që duhet të përmirësohet ose edhe të futet si risi.

KALLXO.com: A ka mundësi që këto dy platforma të harmonizohen në një të vetme dhe kështu të arrihet unifikimi dhe Kosova të flasë me një zë në dialogun me Serbinë?

Visar Ymeri: Ne kemi qenë të hapur dhe vazhdojmë të jemi të hapur si delegacion shtetëror edhe të diskutojmë edhe të dakordohemi për çështje të ndryshme edhe me LDK-në edhe me VV-në përsa i përket dialogut. Është e rëndësishme që këto dy parti politike të përfshihen në delegacion shtetëror.

Republika e Kosovës së paku në një pikë është në pajtim si forca politike si shoqëri në përgjithësi e ajo është që pavarësia e Kosovës, sovraniteti shtetëror e integriteti territorial, edhe subjektiviteti ndërkombëtar as nuk bën e as nuk duhet e as nuk guxojmë ta vëmë asnjëherë në pikëpyetje e as ta vëmë në mëdyshje e aq më pak në tavolinë diskutimesh

KALLXO.com: Ndonëse platforma është miratuar nga ekipi negociator, dialogu është i ngrirë për shkak të taksës 100 për qind. Cili është qëndrimi juaj si delegacion shtetëror dhe cili është qëndrimi juaj si PSD për këtë taksë?

Visar Ymeri: Taksa që është vendosur karshi produkteve serbe është jashtëzakonisht edhe e rëndësishme edhe e duhur sepse kjo është një prej këtyre levave të kushtëzimit që e ka Republika e Kosovës karshi Serbisë duke e pasur parasysh që Serbia për 20 vite rresht e ka përdorur e keqpërdorur tregun e Kosovës sikur të kishte qenë treg i brendshëm i saj.

Është e papranueshme sesi Serbia e kushtëzon dialogun pra me heqjen e taksës në ndërkohë që Republika e Kosovës nuk po kushtëzon me asgjë. Nuk është se ne nuk kemi arsye e çështje e tema me të cilat do të mund ta kushtëzonim dialogun por ne kemi qenë të hapur edhe si delegacion shtetëror që t’i japim shanse dialogut dhe t’i hapim rrugë një marrëveshjeje të mundshme mes dy vendeve.

“Nuk e rrëzojmë qeverinë për taksën”

KALLXO.com: Taksa ka krijuar një ‘thyerje’ edhe brenda koalicionit qeveritar. A është, sipas jush, tani momenti për rrëzimin e qeverisë ‘Haradinaj’, a do t’i ofrojë nënshkrimet PSD-ja për një mocion eventual për rrëzimin e qeverisë?

Visar Ymeri: Për mua ka shumë rëndësi jo vetëm koha kur rrëzohet qeveria por më shumë arsyeja pse po rrëzohet qeveria dhe nëse arsyeja për rrëzimin e qeverisë është taksa, ne në asnjë mënyrë nuk e votojmë e as nuk i ofrojmë ato nënshkrime. Pra, siç e thash edhe më herët, kjo taksë e ka vendosur Kosovën në një pozicion tjetër të dinjitetit. Natyrisht që këtë drejtim duhet të kujdesemi që të mos i prishim marrëdhëniet me miqtë tanë SHBA-të, vendet anëtare të BE-së e kështu me radhë.

KALLXO.com: Nëse nuk rrëzohet qeveria, a mendoni se një qeveri gjithë përfshirëse e propozuar nga LDK-ja do të ishte zgjidhja më e mirë dhe cili do të ishte roli i PSD-së në këtë qeveri?

Visar Ymeri: Këtë propozim të LDK-së e kam dëgjuar përmes mediave, nuk është se kemi pasur takim zyrtarë, me LDK-në, për ta diskutuar idenë pra për mënyrën sesi e kanë menduar e kështu me radhë. Ne vazhdojmë të qëndrojmë prapa idesë sonë se delegacioni shtetëror është rruga përpara përsa i përket dialogut.

Tash këto idetë e tjera pa e pasë një diskutim të detajuar dhe zyrtar është vështirë të vlerësohen. Pra qeveria gjithëpërfshirëse mund të ketë forma të ndryshme qëllime të ndryshme synime të ndryshme dhe pa i pasur parasysh nuk mund të them nëse është ide e mirë ose e keqe. Pra kjo është një ide, një propozim që është dhënë nga një parti politike, ndërkohë që e kemi një mekanizëm të votuar nga deputetët e Kuvendit i cili është aktualisht funksional dhe që është rruga më e mirë përpara në këtë çështje të caktuar.

KALLXO.com Është përfolur shumë për një përafrim me qeverinë, sidomos pas votimit të buxhetit. Çka është duke ndodhur në këtë drejtim? A është duke e shqyrtuar PSD-ja mundësinë që të hyjë në qeverinë Haradinaj?

Visar Ymeri: Jo, as nuk e kemi shqyrtuar as nuk jemi duke e shqyrtuar. Çfarë ka bërë PSD, është që e ka përdorur fuqinë e vet politike që ta vendosë atë në funksion të së mirës së përgjithshme përmes çështjeve të caktuara të cilat i kemi vendosur si kushte karshi votimit të buxhetit.

KALLXO.com: Meqë jemi tek kushtet, në seancën e votimit të buxhetit i keni përmendur 5 mirëpo kryeministri në deklarimet e tij publike e ka përmendur edhe Ligjin për financimin e partive politike.

Visar Ymeri: Ai ligj është votuar në të njëjtën ditë, nuk ka qenë i vendosur si kusht nga ne, po shumë mirë që është votuar sepse pas atij ligji i shtohet dimensioni demokratik edhe i mundësimit të ideve politike brenda Kuvendit të Republikës së Kosovës.

KALLXO.com: Z. Ymeri, gjatë kohës sa keni qenë kryetar i Lëvizjes Vetëvendosje keni deklaruar se figura më e përshtatshme për postin e kryeministrit është Albin Kurti. Çka mendoni tani?

Visar Ymeri: Kur kam qenë në Lëvizjen Vetëvendosje natyrisht që një kohë të gjatë në VV, ne kemi pasur një bashkëpunim të jashtëzakonshëm me të gjithë përfshirë edhe me Z. Kurti dhe në këtë drejtim kanë qenë vendime të organeve dhe të Lëvizjes Vetëvendosje të cilat edhe i kam pranuar edhe i kam përshëndetur edhe pastaj i kam mbrojtur në publik, dhe vërtetë kam menduar që figura e më e përshtatshme atë botë për kryeministër ka qenë Z. Kurti.

Pastaj siç e dini ne kemi pasur një mosmarrëveshje jashtëzakonisht të madhe në mënyrën sesi e shohin politikën e veçanërisht këtë komponentën e demokracisë në mënyrën sesi do të duhej ajo të ushtrohej edhe brenda organizatës e pastaj edhe brenda shoqërisë dhe në këtë drejtim këto mospajtime natyrisht që janë mospajtime politike por mendoj që në Republikën e Kosovës ka njerëz të ndryshëm të cilët kanë një lloj përshtatshmërie për situata të caktuara dhe momente të caktuara siç ka pasur edhe në Lëvizjen Vetëvendosje e cila ka pasur njerëz të ndryshëm të cilët do të kishin mujt me qenë të përshtatshëm për faza të caktuara të zhvillimeve politike në Republikën e Kosovës.

Dhe në këtë drejtim konsideroj që po, ka momente kur Albin Kurti do të kishte me qenë më i përshtatshmi, por ka edhe momente kur unë mendoj që profili i tij publik edhe mënyra sesi ai e sheh politikën do të kishin me qenë jo të përshtatshme për Republikën e Kosovës.

KALLXO.com: Çka po bëni ndryshe në PSD, nga ajo që keni bërë në VV?

Visar Ymeri: PSD, nëse e analizojmë për nga perspektiva konceptuale programore si parti e majtë, mund të ketë përngjasime të mëdha me atë që edhe sot e paraqet VV-ja dhe kjo ndodh edhe për një arsye tjetër sepse njerëzit kryesorë që kanë qenë strumbullari ose bazamenti politik i VV-së, aktualisht janë në PSD. Nuk duhet ta shohim VV-në si diçka që është zhvilluar jashtë nesh, ne e kemi zhvilluar Lëvizjen Vetëvendosje të gjithë bashkë, jo vetëm unë, bashkë edhe ata që kanë mbetur në VV.

Kemi eksponentë të caktuar të LVV-së që kur flasin në publik ta krijojnë përshtypjen që e ndjenjë LVV-në si pronë të tyre. Unë nuk mendoj që VV-ja është pronë e tyre, as e atyre kolektivisht, e veçanërisht as e atyre individualisht. Dhe në këtë drejtim PSD-ja ka një avancim të natyrshëm dhe një vazhdim të rrugës të asaj që e kishte nisur LVV-ja e që pastaj përmes një ndërhyrjeje jashtëzakonisht të dëmshme u ndërpre një rrugëtim drejt rritjes së demokracisë së brendshme, drejt ndryshimit e përshtatjes së qëndrimeve politike karshi situatës e rrethanave në ndryshim e sipër në shoqëri në mënyrë që ta propozojmë më të mirën për Kosovën. Sepse VV-ja vazhdimisht ka avancuar dhe kjo është bërë për të mirë dhe PSD-ja ose njerëzit që kanë dalë nga VV-ja janë anëtarësuar e aktivizuar në PSD kanë qenë pikërisht ky motori i këtij evoluimi e përmirësimi të LVV-së edhe sa kemi qenë brenda. Nëse e krahason VV-në të vitit 2017 me vitin 2010, i sheh dy organizata të ndryshme në dukje, në fjalë, në diskurs, edhe në sjellje dhe në këtë drejtim ky ndryshim ka qenë i nxitur nga njerëzit që sot janë pjesë e PSD-së.

KALLXO.com Sot PSD-ja a i njeh simbolet shtetërore të Kosovës?

Visar Ymeri: Karshi simboleve shtetërore të Republikës së Kosovës ne e kemi qëndrimin shumë të qartë që këto simbole, mënyra sesi kanë ardhur, nuk kanë qenë as demokratike e as një lloj reflektimi i një historie të përpjekjes së popullit për çlirim e mëvetësi. Por sidoqoftë këto janë simbolet e Republikës. Kurdo që të krijohen kushtet për t’i ndryshuar në formë demokratike do ta bënim një gjë të tillë por përsa kohë që janë simbole ne natyrisht që i njohim si të tilla, duhet t’i respektojmë si të tilla dhe i njohim si të tilla.