78 Milionë Euro-Vlera e Tokave të Keqpërdorura nga Gjyqtarët
Gjyqtari Arkadiusz Sedek në gjykimin e dhjetë të akuzuarve për nxjerrje të vendimeve të paligjshme që çuan në keqpërdorimin e pronave të ndërmarrjes KBI “Kosova Export”, të hënën kërkoi informata për parcelat e tilla.
Ai tregoi në seancë se kishte kërkuar listën e pronarëve të mëparshëm të këtyre parcelave në Komunën e Graçanicës, por kjo komunë i ishte përgjgigjur se dokumentet kadastrale komunale ndodheshin në Serbi.
Kur të gjitha forcat serbe dhe administrata që qeveriste Kosovën u tërhoqën në Serbi në vitin 1999, morën me vete edhe këto dokumente. Serbia u obligua me marrëveshje në Bruksel në vitin 2011 që të kthejë kopjet e këtyre dokumenteve, por një proces i tillë ende nuk ka përfunduar.
Të akuzuarit për shtytje në nxjerrje dhe nxjerrje të vendimeve të paligjshme gjyqësore, tetë nga të cilët gjyqtarë, ngarkohen se kanë bërë keqpërdorime pronash të “Kosova Exportit” në pesëmbëdhjetë raste.
Sipas prokurorisë dy vendime të tilla të paligjshme u takonin pronave të tjetërsuara në Graçanicë.
Bajram Selmani gjeodet që doli në terren për të vërtetuar ndërrimin e destinimit të parcelave, i sugjeroi gjyqtarit Sedek që informata për pronarët e mëparshëm të pronave në Graçanicë të kërkojë në bazën e të dhënave të Agjencisë Kadastrale të Kosovës.
Pastaj Selmani tregoi punën që ka bërë në terren.
“Ditën e premte dhe të shtunë kam qenë në terren dhe kam bërë identifikimin e 58 ngastrave kadastrale, prej 53-ve kam bërë foto“, tha Selmani.
Sipas Selmanit për disa parcela të fshatit Llapnasellë mungojnë të dhënat kadastrale.
“Edhe nga fotot e vitit 2013 shumë pak ka ndryshime në terren, me përjashtim të 2-3 parcelave në të cilat ka objekte të ndërtuara, ndërsa në parcelat tjera ka të mbjellur grurë dhe shfrytëzohen për bujqësi” tha exsperti Selmani.
Destinim bujqësor kishin pronat e KBI “Kosova Export-it” edhe kur menaxhoiheshin nga kjo ndërmarrje.
Por mbrojtësi i Sanije Muçollit- avokati Visar Vehapi, ekspertizën e konsideroi jorelevante.
“A keni mundur të konstatoni se personat që kanë ndërtuar, mbjellë dhe ata që kanë rrethuar atë patundshmëri janë paditësit nga këto aktgjykime, e për të cilat po akuzohen gjyqtarët”, i tha Vehapi ekspertit.
Gjyqtari nuk lejoi gjeodetin Selmani t’i përgjigjej kësaj pyetje. Tha se gjeodeti ka pasur për detyrë vetëm të fotografojë, e jo të konstatojë të kujt janë ponat.
“Nuk ka qenë përgjegjësi e tij, ka qenë obligim i tij të shkojë në terren dhe të bëjë fotografi”, tha gjyqtari Sekek.
Me ekspertizën e gjeodetit nuk u pajtua as Zhivojin Jokanoviq, mbrojtësi i Olga Janiçijeviqit.
“Propozoj që ekspertiza të hiqet nga lënda”, tha Jokanoviq.
Të akuzuarit po ngarkohen se në 15 raste me vendime të paligjshme gjyqësore dëmtuan ish-ndërmarrjen publike.
“Dëshmitë e dëshmitarëve thonë se nga 15 aktgjykime, vetëm dy kanë rezultuar me ndryshime kadastrale”, tha prokurori Andrew Carney. Megjithatë, prokurori shtoi se vlera e tokave të keqpërdorura është 78 milionë euro.
Ish-gjyqtari civil në Gjykatën Komunale të Prishtinës, tash i akuzuari Tihomir Mikariq, nuk u pajtua me këtë vlerësim.
“Prokurori po prejudikon se aktgjykimet ishin të kundërligjshme. Ai në fillim tha se vlera e dëmit nuk është me rëndësi, ndërsa tash përmend shifra milionëshe”, tha Mikariq.
Ish-gjyqtari i Gjykatës së Qarkut në Prishtinë Ferid Bislimi, gjithashtu i akuzuar, ishte edhe më ironik ndaj prokurorin Carney.
“Ku janë ato para, a e ka marrë tokën dikush në shpinë dhe e ka çu dikund, a?”, tha Bislimi.
Seanca e radhës është caktuar për 28 maj, ndërsa seanca tjera priten në qershor.
