Nebojsha Stefanoviq - Foto: Rtv21
Ministri serb flet për vrasjen e Oliver Ivanoviqit
Ministri i Punëve të Brendshme të Serbisë, Nebojsha Stefanoviq, deklaroi se vendi i tij është i interesuar të zbardhë vrasjen e politikanit Oliver Ivanoviq, i vrarë në veri të Mitrovicës.
Por, sipas tij, nuk ka interesim për një gjë të tillë edhe nga pala kosovare.
Ai tha se nuk ka shkëmbim të informacioneve për rastin e vrasjes së Ivanoviqit dhe i bëri thirrje EULEX-it që seriozisht të përfshihet në zgjidhjen e këtij rasti.
“Kur nuk ka hetime, rezultate, xhirime, shkëmbim të informacioneve, nuk ka asgjë dhe duket se nuk ekziston vullneti nga ana tjetër”, u shpreh Stefanoviq.
Ndryshe politikani i serbëve të Kosovës dhe kryetari i Nismës Qytetare “Liri, Demokraci, Drejtësi” Oliver Ivanoviq u vra në Mitrovicën Veriore më 16 janar.
Ai u varros një ditë më pas në Beograd.
Deri tani policia ende nuk ka arrestuar ndonjë të dyshuar lidhur me vrasjen e Ivanoviqit./21Media